WILLEMSTAD – E seis partisipantenan na Curaçao Tennis Legends di e fin di siman tras di lomba riba kanchanan di Santa Barbara Beach & Golf Resort mesora a duna nan koperashon pa laga algu di balor atras ku despues di tempu por bende na findishi pa un bon kousa: e lucha di Ride for the Roses (RFTRC) kontra kanser. Ta danki na intervenshon di Eric Kerstens di The Organizing Connection i Corinne Senior ku a regla esaki. Pa e meta noble aki Jacco Eltingh, Fernando Gonzalez, Paul Haarhuis, Jan Siemerink, Sjeng Schalken i Henri Leconte a basha nan firma riba un rèket i tas di tènis. E tenista Franses Henri Leconte na nòmber di e grupo a agregá e siguiente mensahe na esaki: “Konosé bo kurpa. Praktiká prevenshon i oumentá e posibilidat di kura i laga nan hasi tèst na ora”. Riba e anochi di apertura di Curaçao Tennis Legends miembro di direktiva Curd Evertsz di RFTRC a tuma e tas ku su rèket ku awor a haña un balor agregá.

Drpd. Eric Kerstens, Curd Evertsz, Corinne Senior i Jan Siemerink.