Studiantenan di Adriana’s Academy for Arts & Sciences a hasi un tremendo trabou!

WILLEMSTAD- 24 di novèmber 2017 –  E aña aki ta selebrá e di 20 aniversario ku Kòrsou ta riba lista di UNESCO World Heritage. Pa e motibu aki Ofisina di Turismo di Kòrsou (CTB) ta dediká su Year Planner 2018 na arte, kultura i herensia. Den kuadro di esaki a hasi un petishon spesial na Adriana’s Academy for Arts & Sciences bou di direkshon di sr. Girigorio (Papy) Adriana ku a guia un grupo di studiante pa pinta edifisio i monumentonan situá den Skalo. Skalo ta un di e distritonan históriko di Willemstad. Djabièrnè último riba patio di Villa Maria a tene un enkuentro kaminda a presentá tur e pinturanan den forma di un galeria. Minister di Desaroyo Ekonómiko, Dr. Steven Martina tabata presente pa risibí e promé Year Planner i na mes momentu entregá un rekonosementu na e studiantenan komo muestra di apresio pa nan tremendo trabou.

E studiantenan su edat ta varia entre 9 pa 21 aña di edat. Pa e proyekto spesífiko aki e studiantenan a kapta algun ángulo impreshonante di e bunita edifisionan. Tambe dos di e studiantenan a traha riba un pintura di Playa Kenepa  kual lo bai parti patras di e Year Planner. E pinturanan a keda fotografiá i despues inkorporá den e diseño. Pa kompletá, sra. Filomena ‘Elia’ Isenia a krea spesialmente pa e Year Planner un lema dediká na nos herensia. E lema, “Un pueblo konsiente di su herensia i historia, tin desaroyo pa viktoria”, ta papia palabra klá i ta kuadra perfektamente ku e ilustrashonnan di e Year Planner.

CTB ta gradisí e studiantenan: Chayenne van Varsseveld, Riwendy Goarieno, Raydison Walter, Quisanty Paulo, Tahynno Stephens, Kwynelle Ong-A-Kwie, Iwshender de Windt, Timothy Mchardy, Jair Mattheeuw, Paola Maria, Jason Bezemer i Gregeline Pieternella pa nan dedikashon na krea un Year Planner ku ta reflehá e beyesa di nos edifisio i monumentonan den Skalo.