“…U bent van harte welkom…Bon Bini na Rei Willem-Alexander y Reina Maxima”

ORANJESTAD– Pueblo di Aruba y specialmente Renaissance Aruba Resort & Casino ta duna un caluroso bon bini na Pareha Real, Rei Willem-Alexander y Reina Maxima. Pa por duna realse na e bishita di Pareha Real, Renaisance Aruba a percura pa decora tanto su balconnan como e palonan di luz rond di e propiedad cu bandera Hulandes y di Aruba. Ademas di esaki mester haci mencion di e potret di mas di 20 pia largo di e Pareha Real cu a wordo instala acompaña cu luznan color oraño cu lo ilumina e resort den oranan di anochi. Renaissance Marketplace tambe a uni su mes na e celebracion y a decora pa e ocasion. Renaissance Aruba, Mall & Marketplace ta invita henter pueblo di Aruba pa disfruta di e decoracionnan parti anochi y forma parti di e ocasion special di e prome bishita di Willem-Alexander como Rei despues di e traspaso di trono, e bishita aki ta aun mas special ya cu e ta wordo compaña pa Reina Maxima. “Pa Renaissance Aruba Resort & Casino ta un honor pa forma parti di e celebracionnan rond di e bishita di Pareha Real. Via di e decoracion detayadamente scogi nos ta duna un caluroso bon bini na Pareha Real cerca nos aki na Aruba y alabes ta desea nan un bishita exitoso y placentero” esaki di acuerdo cu Sra. Zugheila Lindeborg, Renaissance Aruba  marketing manager