Willemstad- Awe Minister Marilyn Alcalá-Wallé a risibí un bishita di kortesía di dr. Nigel Gravesande,  B.A.,M.A., PhdD., registradó di University of Guyana huntu ku drs. Guno Rugde, dosente na University of Curaçao. Sr. N. Gravensande a bini na nòmber di Minister di Enseñansa di Guyana, sra. Nicolette O. Henry,MP. University of Guyana su empeño ta pa brinda nos studiantenan e oportunidat pa sigui ku nan estudio riba nivel di bachelor, master i PhD. E universidat aki ya tin memorando di entedimentu será ku Aruba i Surinam. Awor tambe ta ofresé estudionan di agrikultura, siensia ambiental & tera, edukashon i humanidat, siensia di salú, siensia di naturalesa, siensia sosial i teknologia na studiantenan di Kòrsou. E evaluashon di alineashon a tuma lugá kaba, kaminda a evaluá kon e estudionan lokal ta konkordá  ku estudionan di University of Guyana.Tambe sr. N. Gravesande a duna di konose ku nan deseo ta pa tin un kolaborashon estrecho ku Universidat di Kòrsou, kaminda tin interkambio di programanan di estudio i studiantenan.University of Guyana ke krea oportunidat kaminda e dos universidatnan por sinkronisá ku otro, forma lasonan ku ta brinda oportunidat pa studiantenan sigui desaroyá nan mes.Den kuadro di vishon di Minister Alcalá-Wallé, pa amplia opshonnan pa studiantenan di Kòrsou studia den region, a palabrá ku Mnister Nicolette O. Henry ta keda invitá pa bini Kòrsou na komienso di aña 2018 pa por sera charter pa nos studiantenen por kuminsa ku nan estudio avansá na University of Guyana.