WILLEMSTAD.–  Fin di aña ta aserkando i un di e tradishonnan ku nos komunidat na Kòrsou konosé ta bendementu di vurwèrk. Den kuadro di esaki, e aña aki, Brandweer Kòrsou huntu ku diferente otro instansia di Gobièrnu ta hibando un maneho kaminda lo kontrolá muchu mas riba diferente kriteria ku bendedornan di vurwèrk i tur persona ku ta hasi petishon pa benta di vurwèrk mester tene su mes na dje. Tin diferente punto ku pa aña 2017 a haña un revishon serka e tim multidisiplinario aki, i ku pa e aña aki lo bai ser implementá pa lokual ta trata benta di vurwèrk na publiko general. Den kuadro di esaki, e tim multidisiplinario ta organisá un anochi di informashon pa tur persona ku e aña 2017 aki ta interesá pa bende vurwèrk ku publiko. No solamente importadornan grandi, pero tur persona ku tin un stènt òf den pasado a yega di bende vurwèrk òf pa promé bes e aña aki ta interesá pa bende vurwèrk lo mester asistí na e anochi di informashon aki.

Durante di e anochi di informashon, kual lo tumá lugá dia 15 òf 16 di Novèmber próksimo, representantenan di Brandweer, MEO, BAB, Openbare Werken, KPC, Haveninspectie lo hibá palabra na tur presenté i lo kompartí informashon balioso na tur rebendedor di vurwèrk. E anochinan di informashon lo ta na World Trade Center situá na Piscadera den sala Enfrou i lo ta for di 7or di anochi te mitar di 9 di anochi. Importante ta, ku tur persona ku ta bai bende vurwèrk durante fin di aña 2017 lo mester partisipá di forma obligatorio durante di un di e sekshonnan aki kual ta un kriteria pa bo por risibí bo permit. Pa partisipashon na e enkuentro aki, mester registrá na Brandweer Kòrsou, na 462-9111 ext. 109 serka Sra. Luzmarie Ster.