Willemstad – Despues di tur e diskushonnan den komunidat tokante e desaroyo de e refineria i e tereno rondó di dje, GreenTown ta presentá un proposishon pa un plan B. Resientemente GreenTown tabatin diferente kòmbersashon ku Minister Presidènt Eugene Rhuggenaath i MDPT pa presentá e proposishon aki. “E proposishon aki ta un win-win pa tur partido ku si bo mira bon ningun hende por ta kontra dje” segun presidente di GreenTown Ron Pin.

E plan B ku ta proponé ta enserá ku riba término hopi kòrtiku por start ku un desaroyo duradero bèrdè riba e tereno, pa despues konstruí un parke kaminda e refineria ta drai aworakí. “Tin asina un tereno grandi ku no ta hasi uso di dje patras di e waya di e refineria ku por limpia i desaroyá na un manera duradero. Si nos tur sigui e desaroyonan no sa ku rafiná ku kombustibel fosil ta bai stòp un dia den su forma aktual. Na e momentu ei por lanta un parke bèrdè. “ GreenTown ta di opinion ku no mester entregá e tereno pero ku Kòrsou mes mester limpia i desaroyá esaki. E desaroyonan ei mester ta duradero, bèrdè i dirigí riba futuro. Esei ta kosta sèn pero ta produsí hopi mas kupo di trabou i entrada. Por start tambe inmediatamente ku e plan aki miéntras e refineria ta eksistí ainda, segun GreenTown. “E partinan ku no ta hasi uso di dje ainda por haña un destinashon den e plan B aki. Pa kada destinashon mester traha un plan. GreenTown ta ofresé su ekspertisio na gobièrnu pa duna sosten i den e kòmbersashonnan ku a hiba  ya a presentá ideanan inovativo kon por hasi esaki.” Ta bon pa menshoná un biaha mas ku GreenTown no ta un desaroyadó pero ke fasilitá i duna su aporte na desaroyo duradero ekonómiko di Kòrsou.

GreenTown tin mas partido ku ta pará kla pa traha huntu ku gobièrnu na un masterplan. “Ta bai pa vários eksperto internashonal, manera European Investement Bank, AECOM i Edgewater Resources, dos desaroyadó di proyekto ku eksperensia amplio riba e tipo di proyektonan aki, TNO ku eksperensia den limpiesa di zeta, i por ehèmpel Rebel Group un eksperto finansiero. Pero sin gobièrnu no por dal ningun stap. P’esei GreenTown ta urgí gobièrnu pa pensa riba e plan B aki i kuminsá proaktivo kuné. “Tur hende na Kòrsou mester realisá ku mundu ta kambiando rápidamente. Nos ta pará dilanti un eskoho sea nos ta keda pegá den pasado òf nos ta bira un di e islanan inovativo den futuro.  Tur esaki ta parse masha kompliká pero pa nos e ta tambe un oportunidat úniko pa nos bai pertenesé na esnan ku ta kana dilanti riba tereno inovativo i duradero.”

Stichting GreenTown Curaçao ta organisá dia 8 di yanüari 2018 un konferensha ku oradornan internashonal i lokal riba e tema How to build a sustanible green city.