Djadumingu awor dia 12 di novèmber

WILLEMSTAD- Novèmber- 2017:  Esaki ta di dos aña konsekutivo ku Banco di Caribe ta sostené e kaminata di Federashon Deporte Olímpiko Kòrsou (FDOK).  E kaminata lo tuma lugá djadumingu awor dia 12 di novèmber saliendo for di Colon. Aña pasá e kaminata a resultá masha eksitoso i ta premirá ku djadumingu awor lo tin aun mas partisipante.  E aña aki tur fondo ku keda rekoudá ta bai pa yuda Kòrsou den su partisipashon na weganan Sentro Amerikano i di Karibe 2018.  Esaki mes ta un di e motibunan primordial pa Banco di Caribe bolbe patrosiná e kaminata. “Deporte na Kòrsou semper por a konta ku sosten di Banco di Caribe, partikularmente si e ta pa stimulá desaroyo positivo serka hóbennan i ta yuda ku nan formashon komo siudadano di nos pais.  Partisipashon di Kòrsou na weganan Sentro Amerikano i di Karibe 2018 bou di nos mes himno i bandera ta algu históriko i nos ke forma parti di esei”, esaki di akuerdo ku sr. Fons Simon, CEO di Banco di Caribe.  E weganan Sentro Amerikano i di Karibe lo tuma lugá na Baranquilla, Colombia otro aña, di 17 di yüli pa 3 di ougùstùs, 2018.

E kaminata ta tuma lugá djadumingu dia 12 di novèmber próksimo i lo kuminsá i tèrminá na e lugá di stashoná outo na Colon.  Ta kuminsá kana 6’or di mainta; tur partisipante por kuminsá registrá for di 5:30 di mainta.  E kaminata tin 2 ruta un di 5KM i e otro di 10KM.  Kontribushon pa e kaminata ta 15 florin. Banco di Caribe ta invitá fanátikonan di deporte i henter pueblo di Kòrsou pa sostené FDOK i kumpra nan karchi na Beep Beep Rio, 24 Uur Uit De Muur, Mensing’s Caminada, ofisina di FDOK i ofisina di FFK na Brievengat. Pa mas informashon por tuma kontakto ku FDOK na number di telefon 4626500.