WILLEMSTAD- For di 6 te ku 8 di Novèmber último Kòrsou por a konta ku bishita di un delegashon di miembronan empresarial prominente di Finance Suriname ku tabata den un mishon komersial aki na Kòrsou. Meta di nan bishita tabata pa a eksplorá e posibilidatnan ku nos merkado tin pa ofrese i deliberá tokante posibel koperashon entre Kòrsou i Sürnam.

Miembronan di e delegashon tantu for di Hulanda komo Sürnam a wòrdu risibi kalurosamente na nos Ministerio di Desaroyo Ekonómiko durante nan bishita.
Minister di Desaroyo Ekonómiko, sr. Dr. I.S. (Steven) Martina, a yama e delegashon bon biní i a desea e miembronan éksito durante nan orientashon di nos merkado lokal. Despues di esaki e miembronan di e delegashon a sostene un deliberashon intensivo ku sra Vanessa G. Toré i sr. Gwido Jansen di e sektor di Koperashon Ekonómiko ku Eksterior na e Ministerio di Desaroyo Ekonómiko.

Tambe durante nan bishita e delegashon a bishitá diferente kompania lokal i a sostené diferente kombersashon ku empresarionan lokal. E delegashon ku tabata di bishita na Kòrsou a konsistí di direktor/ doño di e siguiente empresanan (sektornan): Frijmersum & Frijmersum Consulting (Talentmanagement), New Dawn (Human Resources Consultancy & Training), Gopex International N.V. (Landbouw), Morina BV (Mortgage and Investment advice) en DUKU.cash (FinTech)