…di akuerdo ku korant na Miami….

WILLEMSTAD- 19 di novèmber 2013 – Resientemente e korant ‘Miami Herald’ a saka den su edishon di biahe i tambe online un artíkulo ku a hiba komo tópiko ‘Eksplorando e  milagernan den Karibe’. Christoffel Park di Kòrsou tambe a keda menshoná den e artíkulo aki. Huntu ku Kòrsou a highlight tambe Barbados, Puerto Rico, St. Lucia, Dominica, Grand Cayman i Trinidad. Den e parti dediká na Kòrsou, a pone énfasis riba e beyesa di nos parke nashonal Christoffel. Den e artíkulo e redaktor ta brinda e lektor un imágen mental di e parke i ta duna deskripshon di entre otro; e naturalesa, paisahe, animalnan den habitat natural i historia ku por enkontrá durante un kaminata òf un rekorido den Christoffel Park. Ta un orguyo pa tur ku ta traha den sektor di turismo i pa Kòrsou en general pa un medio di komunikashon manera ‘Miami Herald’ inkluí Kòrsou den su rekomendashonnan komo un di e destinashonnan den Karibe ku fásilmente e turista estadounidense por namorá di dje. E korant ‘Miami Herald’ tin un sirkulashon di 190,751 kopia di print i 6,323,111 publikashon online. E korant ta dirigí su mes den e area di Sùit Florida ku ta un di e merkadonan importante pa Kòrsou. Un publikashon manera esun di Miami Herald mester sirbi komo un empuhe èkstra pa nos tur ku ta habitante di e pais aki sòru pa nos por sigui broma ku nos naturalesa úniko. CTB ke motivá komunidat pa ban sigui kuida nos sitionan natural i asina kontribuí na preservashon di nos produkto turístiko.