..Banco di Caribe impreshoná ku talento di nos hóbennan lokal..

WILLEMSTAD- Novèmber 2013; Banco di Caribe impreshoná ku un otro temporada eksitoso di Luna Yen- e show di talento mas popular pa nos hóbennan na Kòrsou. Esaki ta e di 5 aña konsekutivo ku Banco di Caribe ta aportá na realisashon di e show di talento hubenil ku 7 aña pasá a mira lus na teatro La Tentashon. Pa por a yega na e resultado final a tene tres anochi di klasifikashon durante e wikènt di 8 pa 10 di novèmber na unda a repartí e presentashonnan den tres diferente kategoria; Moveshon, Akrobásia i Baile a wòrdu presentá dia 8 di Novèmber, Presentashon Teatral (aktuashon) a wòrdu presentá dia 9 di Novèmber i Músika, Kanto i Rap a wòrdu presentá dia 10 di Novèmber último. Luna Yen a konta ku partisipashon di 55 hóben di kual 23 hóben (sea den grupo òf individual) a partisipá na e gran final kompañá ku presentashon di 15 hóben  ku a bin for di Aruba i Hulanda. E ganadó apsoluto di Luna Yen 2013 a resultá “Chosen Stars” (kanto) ku asina a logra e oportunidat di partisipá den show di talento na Hulanda. E promé finalista a resultá BEM/ Brass Eternity Music (músika) komo di dos finalista a sali Zaerick Martha (poesía) i tabata DMD/ Marshelon Janzen, Sherry-day & Sherdyenne Lourens (baile) ku a finalisá na di tres lugá. Tur ganadó a risibí un regalu di Banco di Caribe, di man di Sr. Dito de Kort, managing director di Banco di Caribe. “Tur aña di nobo nos ta mashá impreshoná ku e kalidat artístiko di nos hóbennan. Nos ta felisitá nan pa e disiplina ku nan tin i e perseveransha pa alkansá éksito. Banco di Caribe ta kompartí e meta di un show di talento manera Luna Yen; brinda e hóben oportunidat di desaroyá den forma positivo bou di guia profeshonal i semper lucha pa alkansá ekselensia. Nos ta felisitá tur hóben ku a partisipá na e temporada 2013 di Luna Yen. Mashá Pabien”, esaki di akuerdo ku e direktor di banko, Sr. Dito de Kort. Riba fotonan athuntu por haña un impreshon di e anochi final di Luna Yen i entrega di premio ku a tuma lugar djasabra último na teatro di La Tentashon.