A invitá SITKOM pa reuní pa diskutí retironan konforme término den CAO.

Willemstad – Gerensia di UTS, konforme petishon di sindikato SITKOM, a tuma e desishon pa para e ròndu di oferta p’e retiro boluntario ofresé na su empleadonan.  Mesora a invitá SITKOM pa bin mesa pa por kuminsá ku e proseso di retiro, manera stipulá den e kontrato kolektivo vigente.  Gerensia di UTS a tuma e desishon aki, ku bista riba e importansia ku Gerensia ta duna n’e trankilidat pa tantu e empleadonan, komo e klientenan di UTS.  Empleadonan ku a apliká p’e retiro boluntario te ku dia 20 di òktober último, su petishon lo keda tratá bou di e kondishonnan ku a anunsiá.  E desishon di Gerensia  ta yuda aselerá e proseso lamentabel pero nesesario i ta kontribuí na tene gastunan manera e.o. di abogado abou.

E redukshon di personal na UTS ta algu ku ta konosí pa tur envolví, inkluso sindikato, for di momentu ku a kuminsá ku proseso di Business Process Redesign (BPR) na 2009.  Asina funshonnan nobo, den kuadro di BPR, a keda balorá konforme BPR i inkluí den e kontrato kolektivo 2012- 2014.  Loke no a realisá ainda, ta e redukshon di persona preskribí, ku eksepshon di e ròndu boluntario ku a tuma lugá na 2013 i ku nunka no a keda siguí pa e ròndu di retiro obligatorio.  Mientrastantu, UTS ku alrededor di 480 empleado, mester kompetí fuertemente kontra e kompetidónan, ku huntu tin alrededor di 100 hende den servisio.  Difísilmente UTS por keda ofresé komunidat un servisio óptimo na preis pagabel bou di e sirkunstansia aki.  Esaki bou di e sirkunstansia ku rònt mundu nos ta mira un bahada den yamadanan i mas uso di servisio i produktonan a base di data.  Esaki ta algu ku UTS tampoko ta skapa di su efektonan.

Nos komunidat ta sirbi ku un kompania di telekomunikashon ku por garantisá un infrastruktura óptimo, servisio i produktonan al dia i na preis kompetitivo. Un UTS fuerte i ku por ofresé akseso na fasilidatnan ku teknologia di telekomunikashon moderno ta ofresé, ta importante pa tur pilá ekonómiko den nos komunidat manera p.e. sektor finansiero, turístiko i logístiko. Kontinuando kurso sin hasi  e kambio i invershonnan nesesario, ta peligrá e posibilidat pa nos kompania di telekomunikashon ta kla pa sostené e desaroyo ku nos komunidat meresé. E ‘redesign’, inkluso redukshon di personal di UTS, ta parti di e kambionan nesesario pa garantisá e futuro aki.

Gerensia su úniko intenshon ku e ròndu di oferta tabata, pa ofresé su empleadonan un oferta ku ta muchu mas atraktivo (entre 20 pa 21 luna di salario) ku kualke oferta bou di un sirkunstansia similar den merkado.  Ku aseptashon di loke sindikato a pidi Gerensia, ta spera ku por sinta na mesa i atendé e ròndu di retiro na un forma responsabel  i konforme e término i kondishonnan stipulá den e kontrato kolektivo vigente.