Willemstad – Bo tambe ke realisá mas pa bo mes? Tur hende por esaki! E reto ta pa keda siña i pa kompartí bo konosementu ku otro. Riba djasabra 4 di novèmber 2017 Givingism den kolaborashon ku Curaçao Lions Club ta organisá “Sá pa Alkansá”. Tur hende ku ke realisá mas pa su mes, por partisipá na e evento aki ku ta ofresé gratis. Durante di e mainta aki nos lo krea un hofi di tayer i lo ofresé 4 tayer diferente. Kada un ta ofresé ingredientenan pa dominá abilidatnan básiko i siña kosnan importante ku ta práktiko den bida diario i ku ta hasi posibel pa logra generá un entrada propio òf un entrada èkstra.

“Sa pa Alkansa” ta keda organisá simultaneamente na tres diferente skol; Kolegio San Martin de Porres na Sta. Rosa, Fatima College na Suffisant i Kolegio Maria Auxiliadora na Sta Maria. Portanan ta habri pa 9 or di mainta i ta termina mitar di 1 di merdia. Tur ku ta interesá por inskribí pa e siguiente tayernan:

• “ Bo pashon pa kushiná; Bo empresa ”
• “ Kultivá bo propio produktonan di tera”
• “ Solisitá; Bende bo mes”
• “ Transformá bo soño den bo negoshi”

 E tayernan ta kuminsá pa 9.30 am i 11.15 am. Entre e tayernan tin mei ora di pousa i boluntarionan di Givingism i Curaçao Lions Club lo parti un snèk i algu di bebe pa tur partisipante. Pa inskribí delantá pa e tayernan aki por bishitá Facebook página “Givingism/ Danki G” òf  por manda datos di informashon via SMS of Whatsapp na 511-9237.