Philipsburg, 11 di òktober 2017 – Resientemente ENNIA a kuminsá ku pago di daño ku orkan Irma a okashoná na Sint Maarten. Ralph Palm, direktor di ENNIA, ta duna di konosé ku ENNIA ta trata na paga tur daño mas lihé ku ta posibel i ta duna kliente vorskòt kaminda ta nesesario. “Asina nos klientenan por kuminsá rekuperá pronto di e daño ku Irma a laga atras.”

“Rekuperashon lihé na promé lugá ta na interés di e kliente mes, pero mas ku klaro tambe na interés di Sint Maarten”, asina Palm ta bisa. “Na e momentu aki tin un kantidat grandi di claim ku a drenta serka nos. I nos ta ferwagt ku mas lo sigui drenta. No ta tur hende a logra di mèldu daño ahinda después di e impakto enorme ku Irma tabata tin riba e isla.” Ribe e pregunta te ki dia aseguradonan por mèldu daño serka ENNIA, Palm ta kontestá ku – konforme e kondishonnan di e pólisa – esaki mester sosodé mas lihé posibel. No opstante e daño grandi ku Irma a okashoná, según Palm no tin ningún motibu pa kere ku ENNIA lo no ta kapas di paga e daño. “ENNIA ta bon reasegurá serka reaseguradonan grandi internashonal. E montante reasegurá ta kubri e daño balorá di nos aseguradonan”.

E simannan benidero ENNIA ta keda añadí mas kapasidat pa yuda kliente na Sint Maarten mas lihé i mas mihó ku ta posibel. “Nos ta pidi kliente ku no a mèldu nan daño ahinda, pa hasi esaki mesora. Tin e posibilidat pa hasi esaki online tambe. Riba wèpsait di ENNIA (www.ennia.com) kliente por klek pa bai e formulario di daño. Mas ku klaro kliente ta bon biní pa pasa serka nos tambe. Esaki por riba dianan di trabou entre 8:00 i 16.30 or na ofisina di ENNIA na W.J.A. Nisbeth Road 97. Tambe nos ta alkansabel via number di telefon +1 (721) 543 2232”, asina Palm ta sigui bisa.

Kliente por mèldu daño serka e ofisina prinsipal na J.B. Gorsiraweg 6 na Kòrsou tambe.