Sambil a demostrá di ta mas ku un sentro komersial i ta konosí pa e balor ku e ta duna na ekspreshon artístiko, komo parti di rekreo i dibertishon sano pa henter famia. Komo parti di un di e metanan di e sentro komersial, resientemente Sambil a sera un aliansa  ku “Excel Arts Academy”. E akademia aki tin mas ku 15 aña di eksistensia i ta yuda partikularmente mucha, hóben i hóbennan adulto deskubrí, desaroyá i desplegá nan talentonan artístiko i desaroyá nan mes komo siudadanonan ku un balor agregá pa nos komunidat.

Djamars 10 di òktober, tabatin apertura ofishial di e ofisina i showroom di “Excel Arts Academy” den Sambil, siguí pa presentashonnan di e akademia durante e atardi festivo aki. Studiante i lidernan di e akademia aki lo presentá nan talentonan riba un base regular den Sambil i entretené e públiko ku bin hasi kompra i òf  bishitá e sentro komersial aki.

E ofisina di Excel na Sambil lo ta habrí tur djamars i djaweps di 2or pa 6or di atardi pa asina asistí tur ku ta interesá di risibí mas informashon tokante e akademia. Excel ta duna instrukshon di mas ku 6 diferente tipo di arte riba djasabra den SOV Asiento na Rust & Burghlaan. Pueblo di Kòrsou ta keda invitá pa akudí na Sambil kaminda aparte di hasi kompra, relahá, gosa di kumindanan variá den su “foodcourt” i cine, por disfrutá tambe di evento i presentashonnan artístiko ku lo keda ofresé dor di Excel Arts Academy.