Mayoria di nan ta den e CHATA Culinary Team 2018

WILLEMSTAD –  Renaissance Curaçao Resort ta masha orguyoso di su tim kulinario, ku awor tambe ta forma parti di e CHATA Culinary Team. “Nos ta sinti nos mes masha honra di por konta ku algun  kolega asina talentoso i kreativo den kushina. Esaki ta prueba di nos dedikashon komo Renaissance Curaçao Resort tambe, pa semper ofresé platonan di kalidat den tur nos restorantnan. Nos ta deseá nan i tur miembro di e CHATA Culinary Team hopi éksito den e preparashonnan pa Taste of the Caribbean Competition ku ta tuma lugar otro aña na Miami”, esaki di akuerdo ku Maylin Trenidad, direktor di e resort.

Chefnan, Jevgeny Hasselmeijer, Jonathan Pietersz i Sjagnon Winklaar ta prepará pa ofresé e mihó platonan durante di e Restaurant Week 2017. E aña aki Infinity Beach Club i Nautilus Restaurant, ámbos situá na Renaissance Curacao Resort tambe ta partisipá den e siman kulinario tumando lugar te ku 7 di òktober próksimo. Kompañá bo plato ku un dushi kòktel prepará pa Renaissance Curaçao Resort su bartèndernan Girainey Muskus , Luis Para, Brairon Juliana ku tambe a partisipá den e kompetensia di bartènder pa e CHATA Culinary Team. Aki ta felisitá Girainey Muskus komo runner-up di e kompetensia. Koleganan ta masha orguyoso i ta felisitá nan ku e partisipashon i tambe e diferente logronan.

Gana durante Restaurant Week Curaçao

Prepará bo kámara pa un kampaña Click, Tag & Share riba Facebook i Instagram! Saka un foto di bo plato faborito e anochi ku bo bishitá Infinity Beach Club òf Nautilus Restaurant, hashtag #NautilusRestaurantWeek òf #InfinityRestaurantWeek i keda ku chèns di gana un bale di $50 pa bo próksimo bishita na un di e dos restorantnan.  Lo regalá diferente premio durante e siman di Restaurant Week Curaçao, ta nifiká ku bo mester keda ku bista riba página di Facebook di Renaissance Curaçao Resort i Instagram @RenCuracao. Pa mas informashon i pa bo reservashon durante Restaurant Week por yama 435.5000. Kòrda reservá trempan!