Organisashon den Karibe ta haña èkstra tempu

Organisashonnan den Karibe ta haña èkstra tempu pa nan por registrá nan mes pa e Appeltjes van Oranje 2018 di Oranje Fonds. Orkan Irma a hasi un impakto enorme riba e islanan i pa e motibu aki Oranje Fonds ta prolongá e periodo di registrashon te ku 8 di òktober. E tema di e Appeltjes van Oranje  di e aña aki ta ‘Empresario yòn i sosial’. Esaki ta nifiká ku inisiativanan sosial ku personanan bou di 35 aña a inisiá por kompetí pa e premionan. Por registrá via www.oranjefonds.nl/appeltjes. Tur aña na mei Reina Máxima ta entregá e premio na Palasio Noordeinde, Den Haag.

Tur aña entrega di premio ta varia di tema. Oranje Fonds ku plaser ke laga mira ku hendenan yòn tambe por tuma inisiativa pa atendé ku problemanan den komunidat. For di esei ta sali inisiativanan hopi bunita. Pa e motibu ei e Fondo a skohe pa pone spòtlait e aña aki riba proyektonan ku e hóbennan aki a inisiá. Pensa riba hóbennan ku a inisiá un proyekto pa atendé ku soledat serka hende grandi òf ku ta ofresé hóbennan ménos privilegiá di nan edat un mihó futuro.

Kriterio

Proyektonan ku ke bini na remarke pa un Appeltje van Oranje mester kumpli ku algun kondishon. E inisiadó di e proyekto mester ta 35 aña òf mas yòn, e proyekto mester ta dirigí riba konektá i embolbí gruponan di hende vulnerabel  i ta buska boluntario pa yuda den organisashon.  Por haña tur kriterio pa partisipashon riba www.oranjefonds.nl/appeltjes. Na promé instante organisashonnan den Karibe por a registrá te 29 di sèptèmber. Dor ku orkan Irma a asotá mas isla i esaki tabatin un impakto grandi riba e parti di Reino Hulandes den Karibe Oranje Fonds a tuma desishon pa prolongá e periodo di registrashon te ku 8 di òktober.

Premio

Tur aña ta entregá  Appeltjes van Oranje na tres inisiativa ku di un manera eksitoso ta konektá gruponan di hende òf ku a sòru pa e personanan bolbe partisipá den sosiedat.  Tur ganadó di un Appeltje van Oranje ta haña un estatua chikí di bròns trahá pa Prensès Beatrix i un suma di plaka di 15.000 Euro. Tur aña Reina Máxima ta entregá e premionan.

Oranje Fonds

Oranje Fonds ta sostené proyektonan sosial na Hulanda i e parti di Karibe di Reino. Tur aña e ta sostené míles di inisiativa ku mas o ménos 30 mion Euro ku ta sòru pa hendenan topa ku otro, tin ménos soledat, tin komprenshon pa otronan i ta komprometé nan mes pa un otro. For di inisio Rei Willem-Alexander i Reina Máxima ta e pareha patrosinadó di Oranje Fonds. E aña aki Oranje Fonds ta eksistí 15 aña.