Durante JCI Dutch Caribbean su konvenshon nashonal anual, “National Convention 2017”, e tema sentral lo ta koperashon i kolaborashon i nos ke kompartí esaki ku nos komunidat kompletu…

E aña aki tambe, manera ta kustumber, JCI Dutch Caribbean lo tene su konvenshon national anual unda tur e 9 organisashonnan lokal di Kòrsou, Aruba, Boneiru i St. Maarten lo bini huntu pa evaluá e aña ku ta tras di lomba, pero tambe pa prepará pa e aña benidero. E aña aki a toka turno na e organisashon lokal JCI Willemstad pa organisá e evento aki. Mirando ku parti di e evaluashon di aña ta tambe selebrashon di e logronan di e diferente organisashonnan lokal, unda di un òf otro forma nan a krea un impakto positivo riba nan komunidatnan, e “National Convention” di e aña aki ta hiba komo lema “Together on the red carpet”, enfatisando e tema sentral kual ta koperashon i kolaborashon.

JCI Dutch Caribbean ta mira e importansia i e poder di kolaborashon, mirando ku esaki por kondusí na resultadonan ku impakto grandi i duradero riba situashonnan den nos komunidat, ku mester di atenshon. Apesar di promové esaki den nos organisashon nos a krea tambe e posibilidat pa promové esaki den nos komunidat tambe, pa medio di tayernan ku nos lo ofresé na nos miembronan, pero tambe na pueblo di Kòrsou kompletu.

Nos lo tin un tayer titulá “The Power of Collaboration” den kual Sr. Steven Coutinho (Managing Director RBC & Head Operations Transformation Caribbean) lo splika kon e persepshon di kolaborashon a wòrdu formá aki na Kòrsou durante añanan, pa asina krea komprondementu i motivashon pa trese kambio positivo den esaki.

Tambe nos lo tin un tayer di Junior Chamber International titulá “JCI Impact”, ku lo keda presentá pa Sr. Elton Villareal. Den e tayer aki entre otro lo para ketu na loke ta nesesario pa por tin un bon kolaborashon, pa asina krea un impakto positivo i duradero den nos komunidat.

I por último nos sa ku pa tur proyekto ku nos ke hasi pa impaktá nos komunidat positivamente, nos mester di fondonan finansiero. Den e kuadro aki nos lo tin tambe un tayer titulá “How to provide engaging fundraisers and be successful”, ku lo keda presentá pa Sr. Maharo Isenia, Vise Presidente di JCI, kende ta asigná ku e área di “Americas”.

Pa kualke informashon òf pa partisipashon por bishitá e página di Facebook di JCI Willemstad. Por tuma kontakto tambe via email: nationalevents@gmail.com òf por yama e direktor di proyekto, Sra. Irodice Copra na 005999 5636616.

Bini unu bini tur pa huntu nos por restourá kolaborashon i koperashon den nos komunidat, tresiendo kambionan positivo i duradero.