WILLEMSTAD – Renaissance Curaçao Resort ta masha kontentu di por brinda su aporte na e Clear Water Challenge  ku ta bai tuma lugá e fin di siman aki dia 15 te ku 17 di Novèmber.  E Clear Water Challenge ta keda organisá primordialmente pa rekoudá fondo pa konstrukshon di Internat Deportivo Willem Alexander. Konstrukshon di e fasilidat aki ta programá pa kuminsá na 2014. E Clear Water Challenge lo ta un trip di 160KM den kayak rònt Kòrsou i lo konta ku partisipashon di e popular Ryan de Jongh, Chris Perret Gentil i Brandon Ravelo. Renaissance Curaçao Resort a kontribuí ku tantu kambernan di hotèl komo áreanan pa tene konferensha di prensa pa e Clear Water Challenge. Pa Renaissance Curaçao Resort ta importante pa sostené eventonan di tal índole, spesialmente si e meta prinsipal ta pa kontribuí na desaroyo positivo di nos komunidat i espesialmente di nos hóbennan. Esaki ta netamente e meta di e konstrukshon di Internat Deportivo Willem Alexander. E Internat lo ta un fasilidat na unda hóbennan di ménos rekurso ku tin pashon pa deporte por akudí i risibí e guiá i entrenamentu adekuá i profeshonal pa bira deportistanan di taya. Ta bon pa rekordá tur esnan ku ke sostené e proyekto i e Clear Water Challenge di e aña aki ku lo hasi un kolèkt chikitu na kada stòp; Playa Canoa djasabra 9or di mainta, Playa Kalki djasabra 6or di atardi, Habitat djadumingu 7or di mainta, Boca Sami djadumingu 10or di mainta- ademas di esaki nan lo ta kolektando na diferente supermerkado. Renaissance Curaçao Resort  ta deseá Ryan, Chris i Brandon hopi éksito ku e hazaña i ta invitá pueblo di Kòrsou pa sostené e Clear Water Challenge di e aña aki.