WILLEMSTAD – Sèptèmber, Kámara di Komèrsio a lansa su di dos konferensia Curaçao Global Business Point . Na inisio di e konferensia , presidente di Kámara di Komèrsio, sr. Willem ‘Billy’ Jonckheer,  a dirigí algun palabra na partisipantenan na e konferensia. Tema pa e dos dianan di konferensia ta e importansia di inovashon den hasimentu di negoshi. Pa e konferensia a invitá algun oradó internashonal ku lo elaborá riba ‘Kon Manehá Prosesonan di Inovashon’ i ‘Kon Implementá e ISO nobo – 9001:2015. Tambe lo kubri e aspekto; ‘Kon protehá bo inovashon’.

“Un proseso di inovashon bon manehá por yuda bo negoshi alkansá un bentaha kompetitivo duradero,  habri portanan nobo i enfrentá retonan nobo,” Sr. Jonkheer a bisa. “Inovashon den bo modelo di negoshi por hasi bo negoshi kisas e próksimo nombrá den e lista ‘Global 500’. Nos, komo Kámara di Komèrsio tin komo vishon pa Kòrsou sigui desaroyá komo pais ekportadó i e echo ku boso a skohe pa partisipá na e konferensia, pa nos ta muestra ku boso kier hiba boso kompania na un nivel pa kompetí internashonal.”

E moderadónan internashonal invitá pa Kámara di Komèrsio ta; sr. Leo Colomba, di Argentina, Peter Merril di Canada i Paul O’Connor, un Kurasoleño ku base di operashon na Hulanda.