WILLEMSTAD – E di sinku edishon di Curaçao Clean Up tabata un éksito djasabra sigun e organisashon.
E aña aki e enfoke tabata pa boluntarionan tuma nan propio inisiativa. Entre otro Sint Jorisbaai, Caracasbaai, nos sentro di siudat i algun lugá bou di awa a keda limpiá.

E aña aki e organisashon a ser poné den man di e boluntarionan mes: tur hende na Kòrsou ku kier a duna un man, por a skohe un luga i forma nan grupo di boluntario. E fundashon Curaçao Clean Up a fasiltá manera añanan anterior ku harpa, hantskun, saku di shushi i demas material di limpiesa. Apesar di e kantidat di boluntario, e akshon tabata pósibel un biaha mas ku sosten di algun spònser ku a aportá ku material i finansieramente pa kual e fundashon Curaçao Clean Up ta sumamente agradesido. E montante di kilo ku a keda kolektá no ta konosí ahinda, pero esaki ta di menos importansia pa e fundashon. “Nos a skohe pa organisá e Clean Up den un kuadro nobo. E último añanan komunidat a kustumá ku e evento i nan sa kon esaki ta organisá. Nos a sinti ku esaki tabata e momentu perfekto pa laga e boluntario mes tuma inisitiva”, segun Corinne van Hal, e organisashon.

Na St.Joris boluntarionan tabata man na obra. Den e area aki boluntarionan a limpia algun sitio kaminda regularmente shushi ta ser di dùmp ilegalmente. Fuera di esaki atenshon a ser butá riba shushi ku ta yega nos kosta via laman. E area di Mangrove aki ta asina shushi ku durante di e Clean Up planes a ser traha pa bini bek aki 2 luna pa finalisá e tarea grandi aki.

Na Caracasbaai tambe boluntarionan di skol a duna un gran kontribushon, por ehèmpel riba e seru patras di Baja Beach kaminda shushi ta ser tirá regularmente. Na Directeursbaai un grupo a bai limpia i a duna nan kompromiso pa adoptá e lugá i tresé bèk na su estado di gloria. Parti mèrdia algun sambuyado a eliminá un gran kantidat di liña di piska i tayer di outo na playa di Caracasbaai i den area di Palapa Beach Resort. Banda di Caracasbaai, tambe sambuyadónan a limpia bou di awa na Marichi, Piscadera, Boca Sami i Lagun. Un total di mas òf menos 125 boluntario a sambuyá den kuadro di Curaçao Clean Up.

Tabata un plaser mira kon e plataforma di distrikto Willemstad a organisá un akshon di limpiesa riba inisiativa propio den ku kuadro di Curaçao Clean Up. Den e barionan Otrobanda, Pietermaai, Punda i Skalo diferente grupo di boluntario a duna un man. Esaki tabata un kolaborashon entre federashonan di bario, sentronan di bario, kuerpo polisial, sektor priva, organisashonan sosial i habitantenan di bario. Shushi riba kaya, di kurá, den fondo di laman i shushi na entrada di nos haf a keda limpiá. E plataforma di distrikto Willemstad ta konsiente ku un medio ambiente limpi ta di sumo importansia pa un sentro di suidat sano, sigur i atraktivo.

Manera ta konosí, henter luna di sèptember ta ser konsiderá e luna di limpiesa. Curaçao Clean Up a organisá un eksitoso akshon di limpiesa na Klein Kòrsou na kuminsamentu di luna. E fundashon ta hasi yamadá na gruponan di amigu, skolnan, koléganan i demas bario pa organisá nan propio akshon di limpiesa i di e forma aki tambe aportá positivamente na nos medio ambiente. Den e próksimo dos simannan i henter aña e fundashon tei pa fasilitá ku informashon i e materialnan di limpiesa manera menshoná anteriormente. Pa mas informashon tokante di organisashon di un akshon di limpiesa òf informashon tokante di limpiesa bishitá www.curacaocleanup.com of Curaçao Clean Up riba Facebook.