Produkshon sinematografiko lokal ku nivel internashonal

SENSEI REDENSHON ta un “Akshon Drama” graba 100% na Korsou, ku hopi esena den e kayanan di Otrobanda I diferente otro barionan di Korsou kaminda hopi pero hopi hende a kolabora sin ningun interes pa fasilita e produkshon di e diferente esenanan ku a ser graba dor ku nan a kere firmemente den e proyekto. E hoben sineasta lokal German Gruber Jr. kende ya den pasado a demostra su talento komo produktor I director sinematografiko ku e pelikula “E Leyenda di Buchifil” kual a duna Korsou e prome luga den e “Festival Sinematografiko Internashonal di Trinidat & Tobago”  ademas di a logra un impakto grandi na diferente pais kaminda ela ser presenta, ta bolbe brinda korsou e posibilidat di disfruta di un kombinashon di talento lokal tantu patras di kamara komo den kada un dje aktuashonnan ku e pelikula “SENSEI REDENSHON. E team di produkshon a traha mas of menos durente tres ana for di inisio di e proyekto ku e trahamentu di un idea I redakshon di script I di kada un dje kombersashonnan di e personahenan, buskamentu di “Locations”, panja I hopi rekisitonan ku a sirbi pa duna e karakteristika di kada esena. E plan di produkshon I e shooting di e pelikula a ser realisa den dos fase. E prome fase di filmashon a start na kuminsamentu di anja 2012 kaminda hopi hende a duna un sosten invalorabel I tambe den e didos fase ku a kulmina  algun siman pasa den e realisashon final di e proyekto.E aspekto mas relevante den henter e proyekto aki ta e aporte di e aktornan ya ku mayoria di nan a duna nan kontribushon praktikamente por nada I te hasta esnan ku a kobra pa nan trabou a hasiele pa un montante kasi “simboliko” es desir, kasi por nada. Tin un konstelashon di artistanan masha relevante den e grupo aki kaminda nos por menshona entre otro Raul De Windt komo protagonista, Redferne Regales, Benazir Charles, Sharif Sprokel, Brian Pietersz, Vale Croes kende tin un figurashon masha importante tambe, Edsel Juliet, Amos Balentien, Merietza Haakmat I henter un elenko masha grandi mes. Premiere di e pelikula SENSEI REDENSHON ta dia 28 di November tantu na Korsou komo na Aruba I e lo keda draai durante algun siman na Cinemas pa duna oportunidat pa un I tur bai disfruta di e tremendo produkshon aki. E team di produkshon di SENSEI REDENSHON tin ku gradisi tur e sponsernan ku a yuda den e realisashon di e film aki, entre nan nos tin ku yama un danki speshal na Auto City, Curacao Tourist Board, Distribier, Girobank, Korant Amigoe, Hotel Howard Johnson, Arke Fly I finalmente un danki masha masha speshal na Fundashon Bon Intenshon, kual sin su koperashon nos no por a logra e kulminashon di e proyekto aki. Tambe na kada siudadano ku a duna un man ku su pasenshi den kada un dje grabashonnan. Tin hopi hende ku tantu personal komo na nomber di diferente instansha a duna un man I esei a hasi posibel ku e proyekto aki a keda kulminan I di nos banda masha masha danki. Nos ta invita un i tur pa disfruta di e trabou di e grupo grandi di profeshonalnan aki ku a hasi un esfuerso grandi pa produsi e tremendo obra aki.