WILLEMSTAD – Sèptèmber 2017– Rekoudashon di fondo den un di e eventonan regional di mas grandi pa kuido di kanser a ranka sali den Karibe hulandes i ingles, ku mas ku 267,119 dòler merikano rekoudá te ku awor serka 160 patrosinante korporativo. Ta premirá ku e di seis edishon di e CIBC FirstCaribbean Walk for the Cure lo atraé riba 20,000 kanadó i koredó atrobe den e diesshete teritorionan kaminda e banko ta aktivo. E kaminatanan lo tuma lugá den luna di òktober 2017. “Nos ta hopi entusiasmá ku e kaminata di e aña akí”, Trevor Torzsas ta bisa, kende ta e Ko-Presidente Ehekutivo di e kaminata i Direktor Ehekutivo di Customer Relationship and Management na e banko. “Tin un ola di energia pasando den nos organisashon awor ku sentenares di nos personal ta okupá ku algun evento pa rekoudá fondo i ku planiamentu di e diferente kaminatanan.” “Aña pasá nos a rekoudá 500,000 dòler merikano den henter Karibe, ku nos a hasi donashon kuné pa apoyá e organisashonnan pa kuido di kanser, ku ta partner ku nos, den nan trabou ku ta kambia bidanan den e paisnan kaminda nos ta aktivo. E aña akí nos ta bai hasi tur loke nos por pa sigurá ku nos ta surpasá e sifranan di aña pasá”, Mark St. Hill ta añadí, kende ta e otro Ko-Presidente Ehekutivo di e kaminata i Direktor Ehekutivo di Retail and Business Banking.

“Komo famia korporativo nos konosé e dolor i pèrdida ku kanser ta kousa. Promové konsientisashon, logra detekshon tempran i hasi bida djis un tiki mas komfortabel pa esnan ku tin kanser, nan famianan i e dunadónan di kuido, ta loke nos kaminata ta trata di dje”, St. Hill ta splika. Ta usa e fondonan rekoudá pa duna yudansa, kuido i konseho na pashènt i nan famia i tambe pa logra mas konsientisashon via kampañanan edukativo den e region. Tambe ta yuda diferente organisashonnan kumpra i mantené ekiponan ku ta usa pa diagnostiká kanser i pa duna pashènt tratamentu. Den e sinku añanan ku a pasa, e banko a rekoudá mas ku 1.3 mion dòler merikano ku e evento akí den region Karibense, danki na primordialmente e donashonnan di empresanan generoso i e diferente aktividat- i eventonan pa kua miembronan di personal tabata anfitrion. E ko-presidentenan ta anunsiá ku pronto e banko lo lansá su wèpsait mehorá pa e registrashon di partisipante i pa hasi donashon. E ekspektativa ta ku esaki lo amplia e posibilidatnan pa rekoudá fondo. Nan ta elogiá e esfuersonan di e personal di e banko pa rekoudá fondo i tambe e sosten di e komunidat empresarial ku ta biniendo a bordo komo spònsernan platina, oro, plata i bròns.

E aña aki e atrobe CIBC FirstCaribbean su filial na Kòrsou ta partner ku Prinses Wilhelmina Fonds den kuadro di Walk for the Cure.  E patrosinadònan mayo di e evento aki na Kòrsou ta inkluí Always, Amigoe, Curoil, Ensure, Extra, Kellogg’s, LBH Group, Neutrogena i NuCuraçao Windparken B.V. E kaminata ta tuma luga Djasabra 21 di Òktober pa mitar di seis di atardi (5:30 PM). Partisipashon ta kosta 17,50 pa adulto i 10 florin pa mucha.

Ta tene e kaminata pa e kai pareu ku e Canadian Breast Cancer Foundation’s CIBC Run for the Cure, ku e banko su kompania mama, CIBC, ta patrosiná. CIBC tin 21 aña ta sostené e evento akí, hasiendo miyones na donashon pa investigashon di kanser na pechu na Canada.