Careda di MTB den pareha ta conta cu participacion di Aruba, Bonairo, Curacao y Hulanda

ORANJESTAD (AAN) 14 november 2013: Cu e crecemento exponencial di e deporte di mountain bike na Aruba, por mira e entusiasmo grandi pa participa na e careda di pareha conocir pa Duo Xtreme Aruba. E di cinco edicion di Duo Xtreme ta tuma lugar diadomingo awo, cuminsando pa 6:30am na Moomba Beach. Ja caba e inscripcion a inicia cu 108 participante di Aruba, Bonairo, Curacao y Hulanda. E inscripcion lo continua te cu diaberna 15 november proximo. Por inscribi na Tri Bike Aruba y Radioshack Aruba for di 9am pa 6pm. Diabierna anochi inscripcion ta posibel na Moomba Beach for di 7pm-9pm. Participacion ta costa $60 pa pareha. E careda ta consisti di dos distancia, 37km half route y 70km extreme route. E careda lo start na Moomba Beach cu un recorido, den parti noord di Aruba, direcion Parke Nacional Arikok. E ruta ta sigui te na Sabana Basora y ta regresa via caminda di Maria Maai, San Fuego, Shete, Angochi y Ayo. Despues di pasa bushiribana e recorido lo pasa via costa noord pa bolbe bek na Moomba. E careda aki ta conta cu un gran cantidad di voluntario riba ruta pa controla trafico, y seguridad di cada participante. Diadomingo 2pm e entregamento di premio lo tuma lugar na Moomba Beach sigui pa un afterparty cu DJ’s y Tsunami. E organisacion di Duo Xtreme Aruba ta invita tur fanatico di mountain bike pa bini y celebra hunto cu e ciclistanan e di 5 edicion di Duo Xtreme na Aruba. Por mira e pagina di Facebook: Duo Xtreme mtb challenge Aruba pa mas informacion di e careda.