Renaissance Aruba a ricibi beursalen

ORANJESTAD – AUG– Un grupo grandi di studiante (beursalen) a acudi recientemente na Renaissance Convention Center pa e Millennial Business Council unda cu a prepara e studiantenan cu proximamente ta bay studia den exterior riba varios topico, den esaki Renaissance Aruba Resort & Casino a ofrece un exitoso workshop di cushinamento. “Nos ta masha contento cu e acogida y participacion di cada studiante. Nos a purba duna e studiantenan tipnan valioso cu nan por uza durante nan estadia y tambe pa den transcurso di nan bida nobo na Hulanda. Nos ta consciente cu e cambio den bida di e studiante tin su impacto ta p’esey nos a organisa e workshop di cushinamento den Millennial Business Council como un aporte. Loke hopi biaha e studiante ta sinti falta di dje den exterior ta e cuminda, nos ta spera cu uzando e diferente tipnan, nan por sinti un poco mas na cas”, esaki di acuerdo cu Zugheila Lindeborg di Renaissance Aruba Resort.

E evento a resulta masha exitoso, hobennan a ricibi tipnan manera con pa cushina saludabel, prepara platonan cu recetanan facil y ‘budget friendly’, tambe nan a ricibi tip nutricional riba un sistema alimenticio cu ta den balansa. E studiantenan por a presencia demostracionnan ‘live’ di algun receta prepara pa Chef Max conhuntamente cu Chef Claudio y Danie. Como parti di e programa, Rudy e personal trainer di Renaissance Aruba Resort a keda encarga pa duna tur studiante algun tip riba un bida mas saludabel y con pa come den balansa, dushi pero den porcion modera. Tur studiante tabata tin e oportunidad pa haci pregunta den e tanda final. Despues di e evento cada studiante a ricibi un certificado di participacion.

Renaissance Aruba Resort ta spera cu tur studiante uza e tipnan cu nan a ricibi pa haci nan bida na Hulanda un poco mas facil y saludabel tambe. Ta desea tur studiante hopi exito cu e reto nobo nan dilanti y tur cos bon cu nan estudio. Riba fotonan adhunto un imprecion di e Millennial Business Council cu a tuma lugar na Renaissance Convention Center.