Willemstad – Durante un seremonia na Landhuis Klein Kwartier ku a konta ku presensia di miembronan i algun invitado di e klup, Curaçao Lions Club a instalá un direktiva nobo pa aña 2017-2018. Bou di e invitadonan tabata presente presidente di e klupnan ruman Aruba Lions Club i Bonaire Lions Club. Tur presente a rekonosé e bon trabou di e direktiva anterior i a elogiá e presidente saliente Alexis Daou, ku pa dos aña siguí, a karga e responsabilidat di dirigí e klup.

Curaçao Lions Club ya pa 71 aña ta sirbi nos komunidat ku proyektonan hopi konosí i eksitoso manera Fundashon Duna Mucha un Man, Bon Bisiña, Senior Citizens Day i e klup di hóben di skol sekundario Leo Club. Ademas e klup ta hasi diferente donashon na organisashonnan ku ta enfoká entre otro riba hóben, nos grandinan, arte i kultura. Curaçao Lions Club tambe ta organisá diferente aktividat di fundraising pa rekoudá fondo pa invertí bek den e proyektonan sosial positive aki. Entre e aktividatnan di fundraising mas konosí di Curaçao Lions Club ta e fiesta di karnaval i “Haring & More”.

Miembronan di direktiva di Curaçao Lions Club 2017-2018 ta President Claudia Prodan, Immediate Past President Alexis Daou, Secretary Mariela Romero, Treasurer Ellen Goilo-Klok, 1^st Vice Michael Hernandez 2^nd Vice Maarten Thissen, 3^rd Vice Andy Nicolaas, Tamer Betty Santiroma i komo Director Victor Libie i Humphrey Genaro.

Direktiva nobo di Curaçao Lions Club ta spera di por sigui konta ku sosten di un i tur pa huntu kontinuá ku e trabounan valioso na bienestar di nos komunidat.