Djaweps 29 di yüni service club Rotaract Club of Curaçao (Rotaract) ta organisá CURCYCLE, ku ta konsentrá riba stazjèrnan. Ku CURCYCLE nos ke puntra tur stazjèr ku ta bayendo for di Kòrsou pa hasi donashon di e kosnan ku nan no por bai kune. Enbes di tira tur kos afó, nos ke puntra tur stazjèr pa hasi donashon di nan kosnan na un di e 3 puntonan di kolekshon. Tur donashon lo bai pa ‘Fundashon Siloam Village’.

Esaki ta e promé aña ku Rotaract ta organisá e evento aki. E persona tras di e idea ta Oprah Alberto, un di e miembronan di Rotaract. Ora nos a puntr’é kon e a yega na e idea, e a elaborá: “ Aña pasá nos tabatin un stazjèr na trabou i ora e a kaba su stazje e tabatin hopi kos ku e no por a bai kas bèk kune, pero ku tabata den bon estado. Lo ta piká pa tira tur kos afó i e no por a laga tur kos den su apartamentu. Mi a propon’é pa hasi un donashon ku e kosnan ei. Un konsepto hopi simpel. E aspirashon ta pa hasi e projekto mas grandi ku Rotaract i den koperashon ku ‘Fundashon Siloam Village’ e  impakto lo ta mas grandi.”

Rotaract ta spera ku nan por entusiasmá hopi stazjèr pa e evento aki. Asina nan por hasi donashon na e komunidat di Kòrsou. Por hasi donashon dia 29 di yüni for di 18.00 or te 19.00 or na ‘Salinja View Studenten Appartementen’ i tambe di 19.15 or te 20.15 or na Nieuwestraat (Kiosk Remy). Na Landhuis Zeelandia tambe por hasi donashon di kosnan ku bo tin de sobra  di 18.00 or te ku 21.00 or.