WILLEMSTAD/ E kansion kisas bo a tende kaba, pero ta despues di algun luna ku Arafad ta estrená video clip di ‘Hér0e’. E kansion ku featuring di Mason i Sean Cannister porfin awor tin un produkshon visual. Arafad no ta deskonosí den e género musikal urban, aña pasá su kansion dediká na Dia di Tata, a zona ku gran fervor, partikularmente debí na e presentashon di su yu hòmber. Awe, Arafad ta kontentu di estrená su video clip, e ta konta ku e’la kana ku e idea di graba e video clip pa algun tempu i finalmente e produkshon ta un echo.

E kansion, un urban love song, ta konta di un pareha ku ta ekskluí nan mes for di mundu i ta dediká na nan metanan. Parti di e letranan, “Ami ku bo so… Nada por bin entre nos.” ta ekspreshon di un amor sólido. Decoded ta invitá fanatikonan pa mira e video clip ‘Héroe’ di Arafad riba nan Youtube Channel. Tambe por sigui otro artistanan di Decoded riba Facebook, Decoded Official.  Arafad ta indiká ku e kolaborashon di Mason, Sean Cannister i Greyan Studios tabata di gran importansia pa realisashon di e video clip. Por sigui, Arafad riba Instagram, Facebook i Snapchat.