Mustrando aprecio y gratitud pa continuo relacion

ORANJESTAD – Recientemente Renaissance Aruba Resort & Casino a tene su fiesta tradicional pa tur nan clientenan corporativo. Un fiesta caminda cu Renaissance Aruba a gradici cada ehecutivo pa nan relacion y confiansa deposita den Renaissance Aruba pero tambe pa nan sosten y lealtad. E team dinamico di Renaissance a organisa un anochi ameno pa tur invitado.

Renaissance Aruba a gradici tur presente y hunto a refleha riba e aña cu a transcuri, mientras ya caba a cuminsa plania pa e aña nos dilanti yena cu reto y cosnan nobo. A informa tur ehecutivo di e plannan cu ta na caminda y kico nan por spera di Renaissance Aruba pa e proximo periodo. Despues a sigui un cena y fiesta pa celebra e continuo relacion. Un anochi caminda mas cu 200 invitado, consistiendo di ehecutivonan y amigonan empresarial di Renaissance Aruba a socialisa y estrecha lasonan di contacto. Decoracion tabata den man di Mosaic cu ayudo di e team di Renaissance Aruba Resort. Efectonan di luz y zonido tabata na encargo di KoFu di High Performance, cu a percura pa e anochi na Renaissance Aruba su Festival Plaza a keda ilumina y accentua cu mas di 500 ‘strings’ di luz, mientras cu Mega Teca Genie & N’Fuzion a entretene cu musica y bon ambiente. Un delicioso dinner buffet a keda prepara pa e team culinario di Renaissance Convention. Invitadonan a keda altamente impresiona pa e bon ambiente, dushi musica y delicioso cuminda. Na final a rifa algun premio, entre nan un weekendstay na Renaissance Aruba Resort y tambe un na Renaissance Curaçao Resort.