Crazy Diamonds ta sigui ku e rekorido rondó di mundu den 8 aña, djis pa rekordá na 2012 e biahe eksplorando e mundu karnavalesko a start. E kontinente nan ku ya nos a bishita ta Europa i Afrika. Pa 2014 nos ta siguí en buska, nabegá den awanan i kaba na e parti mas oriental di mundu kaminda solo ta sali. Hapon, un pais grandi yena ku mito nan i un fantasia i un kultura sumamente elevá, un di e figura nan mas konosí ku ta identifiká Hapon ta nan Geisha i Samurai. A  kis pa trese un fantasia ku den kual tur hende por rekonosé e Geisha den un forma karnavalesko. Nos a usa tur elemento ku e trahe original tin. Na mes momento e toke di lokura di kolo ku Crazy Diamonds ta rekonosé tambe ta bria, oraño; bèrdè, pretu,lila i fuksia. E samurai ku semper den kuenta nan di ada hapones ta e defensor di e pueblo tei pa protehé tur e Geisha nan ku lo partisipá den Gran Marcha 2014 huntu ku Crazy Diamonds. E trahe maskulino ku un toke apart ta den e mesun balanse ku e kolor nan ku e hende muhé nan ta uza. Un eskoho a wòrdu hasi pa uza diferente diseño di tela ku imprenta nan varia di flor, dragon i símbolo nan hapones. E trahe femenino ta konsistí di 2 diseño: 1 shòrt haltu te na taya ku e sinta mara na sintura den un forma grandi patras ku ta aksentuá figura. E manga ta un banda largu ku i e otro banda kòrtiku un toke di e samurai. E di 2 trahe di hende muhé tin e mes un detaye nan solamente e ta den forma di un shimis, e parti dilanti tin un korte skùin i e patras largu. E trahe maskulino ta konsistí di un karson pia nan hanchu parti abou parti den 2 kolo. E kamisa ta den forma di un yas ku un bant na barika. Un banda tin un manga aden i e otro banda e ta largu. E headpiece di e hende muhé nan ta dòrna ku flornan hapones Cherry Blossom, Chòp Sticks i Sapatu Geta i sinta di diferente kolo,  tur un fantasia. E hende hòmber tin un kasko tradishonal yama “Kabuto” ku e Samurai nan tabata bisti. E trahe a wòrdu diseñá pa Pierre i kose pa Rolfis. Danza lo ta e banda ku ta kompaña Crazy Diamonds durante Gran Marcha. I komo e chèri riba e bolo Amos Balentin lo animá durante e marcha nan i Hunnely Felicia tambe lo tei durante un parti di e marcha nan pa asina e 2 Rei nan di kaya pone un tremendo ambiente i asina laga e grupo “Shine like a Diamond” Pa mas informashon por tuma kontakto ku Monique 5167828 òf Orsine 5627299 òf via página di  Facebook: Crazy Diamonds Curaçao Carnival Group.