Willemstad, 8 yüni 2017 – Preparashon pa e magno evento annual, esta “JCI Mid-Year Meeting” ta den ful swing.

Junior Chamber International (JCI) tin e mishon di proporshoná oportunidat di desaroyo pa empoderá tur persona entre 18 pa 40 aña, pa krea un kambio positivo na mundu.

JCI Dutch Caribbean ta mama di 8 kapítulo repartí den Reino Hulandes di kual 4 kapítulo ta di Kòrsou. Aki ta papia di JCI IOBA, JCI Willemstad, JCI CLIC, I tambe JCI UC.

E aña aki JCI United Citizens of Curaçao (JCI UC) tin e privilegio di “host” e Mid-Year Meeting kual ta un evento di 2 dia kaminda tur e kapítulonan di JCI ta bini huntu pa forma parti di diferente training, reunion, seremonia ofisial i aktividat sosial pa dibertí i rekrea. Tur esaki ta keda akompaña pa bon musiká, kuminda, bibida, i naturalmente e tremendo ambiente ku JCI semper ta ofresé pa un preis abou i kumbiniente.

E aña aki e tema ta “Merry Everything and Happy Always” pa asina laga nos rekordá i disfrutá di un di e momentu nan mas dushi di aña kual ta Pasku i fin di aña.

E evento aki no ta solamente pa miembronan di e kapítulonan di Kòrsou, Aruba, Bonaire i St.Maarten pero tambe pa públiko en general. Prinsipalmente hóobennan entre 18 pa 40 aña ku ta deseá pa konose JCI mas di aserka i ku tin e ambishon pa krea un impakto positivo den nos komunidat. Esaki ta bo chèns di forma parti di un evento úniko riba nivel internashonal aki na Kòrsou.

Pa mas informashon tokante preis, training, i lokalidat por bishitá e pagina di Facebook di JCI United Citizens of Curaçao of por mail nos na JCIUCMYM2017@gmail.com.