DEN KUADRO DI CURINDE SU ESFUERSO PA KREA MAS AIRLIFT RUMBO ZONA EKONÓMIKO KÒRSOU

Willemstad 5 di Yüni 2017-  Resientemente Curinde a fasilitá presentashon di Sunrise Airways na komersiantenan den zona ekonómiko di tantu Koningsplein komo Hato.  E presentashon aki a tuma luga den kuadro di Curinde su esfuerso kontinuo pa krea mas kupo pa pasahero i karga for i pa región en general pero partikularmente di Haiti i Cuba.  Sunrise Airways a presentá un alternativa real pa  kumpradonan mayorista por bini Kòrsou i kumprá den nos zonanan ekonómiko.   Esaki ta parti di Curinde su esfuerso kontinuo pa no unikamente krea un mihó infrastruktura pa hasi negoshi den nos zona ekonómiko pero tambe pa promové nos zonanan i fasilitá mas aktividat ekonómiko den nos zonanan.  Sr. Sergio Valkenburg, den representashon di Sunrise Airways, a tene e presentashon.

Kombinando e servisio ku Sunrise Airways ta ofresé i mediashon di Curinde lo fasilitá kumpradonan for di primordialmente Cuba i Haiti di e forma aki pa bin hasi kompra den nos zonanan ekonómiko.

Sunrise Airways ta un kompania aéreo ku a keda lanta na 2010 i ta perkurá pa servisio di charter.

E kompania a mustra disponibilidat pa desaroyá charternan for di Cuba i Haiti pa Kòrsou, den un pakete total.  Prinsipalmente Cuba ta un merkado intersante pa Kòrsou desaroyá komo merkado nobo miéntras ku Haiti ta un merkado tradishonal pa nos zonanan.  Curinde, den kuadro di su esfueronan pa desaroyá merkado pa nos zonanan ekonómiko, lo komplementá e esfuersonan afin ku nos por desaroyá mas demanda i kumpradó for di Haiti i habri e merkado di Cuba. E entusiasmo ku e esfuerso aki a keda risibí ta base pa siguí desaroy’é afin ku nos zona ekonómiko por konosé mas aktividat i kompra for di tantu Haiti komo Cuba.