Pa motibu di e parada di Crude Distiller 3 (CD-3) a konsekuensia di e kandela último, Refineria Isla a pone su planta Thermal Cracker 1 (TC-1) den servisio komo “crude distiller”. Den pasado ya kaba e planta aki (TC-1) vários biaha, a yega di funshoná komo destiladó di krudo.

Ku TC-1 komo destiladó di krudo, Refineria Isla por prosesá parti di e krudo liviano/ mediano ku tabata destiná pa CD-3. Asin’akí Refineria Isla ta rekobrá 40% di loke normalmente ta keda prosesá na CD-3.

Aparte di TC-1, riba djaluna 5 di yüni, 2017 Isla a start su “crude distiller” CD-2B riba krudo pisá (Tia Juana Pesado).

Pues TC-1 huntu ku CD-2A (ku ya tabata den operashon) i CD-2B ta prosesando sesenta porshento (60%) di su kantidat total di krudo na Isla.

Refineria Isla ke gradisí tur su trahadónan pa e esfuerso aki i manera nos a informá anteriormente, entrega di kombustibel na komunidat, ta keda garantisá.

Asina nos tin mas informashon di nos prosesonan nos lo sigui mantené nos komunidat informá.