Despues di e estreno mundial durante e festival sinematográfiko na aprel, Curaçao IFFR ta presentá  e entertantu tan afamá dokumental musikal Salsa Giants, bèk den teater The Cinemas for di djaweps 14 di novèmber. Luna pasá e dokumental musikal Salsa Giants ketu bai tabatin salanan yen durante Morelia Film Festival na Mexico. E muzik di e disko kompakto di  Salsa Giants ta nominá pa un Latin Grammy Award pa e  ‘Best Salsa Album’. E historia entretantu ta konosí. Riba 31 di ougùstùs 2012, 10 artista mundial den ramo di salsa pa di promé bes a bini huntu riba ún tarima: Tarima Sir Duke di Curaçao North Sea Jazz Festival. Nada ménos ku e kantante di hit tras di hit Marc Anthony, e basista históriko impaktante Oscar de León, Cheo Feliciano, Willy Chirino, Charlie Zaa, Jose Alberto ‘El Canario’, kantante Tito Nieves, Nora di Orquesta de la Luz, Luis Enrique i Andy Montañez bou di e dinámiko direkshon di produktor  Sergio George nan a toka ku nan alma i kurpa pa un públiko di mas ku 12.000 alma. E direktor sinematográfiko merikano-venezolano Pablo Croce a inmortalisá e momento spesial akí den un dokumental akogedor, íntimo i mas ainda yen di swing. Imágennan di ‘back-stage’ blanku ku pretu yen di ambiente, filmashon di ensayonan ku tabata skupi kandela di nan dinamismo, imágen di archivo i entrevistanan personal ku e músikonan den un edishon rítmiko akabá den un montahe di totalidat dinámiko. Naturalmente Salsa Giants ta kontené hopi imágem bunita di e konsierto spesial durante Curaçao North Sea Jazz Festival 2012. Espesialmente i únikamente pa e funshon prinsipal di 20.00 or di djaweps 14 di novèmber ta konta i ta vigente : “Get in the Salsa Mood”: bini ku bo pèchi di La Serie bistí i bo ta risibí dos karchi pa e preis di ún.