Willemstad – Riba 18 di Mei ta tuma lugá e di kuater anual konferensha ‘Curaçao Airport Partners Aviation Security Conference’, o sea ‘AVSEC Conference’, kual ta e konferensha organisá pa CAP dediká na seguridat den aviashon. Durante e konferensha lo tin vários presentashon ku ta trata prinsipalmente e riesgo di terorismo den aviashon i e impakto ku por resultá for di esaki, por ehèmpel e impakto ekonómiko. E aña aki CAP a invitá Leticia Monteagudo, antes un di e ehekutivonan na IATA (International Air Transport Association) i aktualmente direktora ehekutivo di Smart Security Airport Consulting; Anthony Frederick, Manager AVSEC-FAL / HSSE Unit na Trinidad &Tobago Civil Aviation Authority i antes Senior Official den e área di Seguridat den Aviashon di ICAO (International Civil Aviation Organization); Lesley Fer, Direktor di Direktorado di Prevenshon i Maneho di Kalamidat bou di Ministerio di Asuntunan General di Kòrsou; i orador representando Curaçao Airport Partners lo ta Ralph Blanchard, Chief Executive Officer di Curaçao Airport Partners.

E konferensha ‘AVSEC Conference’ ta un plataforma informativo pa supervisornan di seguridat aéreo, kordinadó- i inspektornan di aviashon sivil den e parti Karibe di Reino Hulandes, i partnernan den área di aviashon, turismo i ekonomia,  kaminda ta presentá  tópikonan krítiko riba seguridat i medidanan internashonal. Ophetivo di e konferensha ta pa mehorá konosementu pa ku implementashon di medidanan di seguridat p’asina protehé i salbaguardiá aviashon sivil kontra interferensia ilísito kometé na tera òf durante di buelo.  Ta e di kuater aña konsekutivo ku Curaçao Airport Partners (CAP) ta organisá e konferensha di seguridat den aviashon.

Selekshon di orador interesante
Un di e maneranan ku CAP ta purba na atraé representantenan den e área di seguridat aéreo pa e konferensha, ta dor di selektá oradornan interesante ku ta trata tópikonan krítiko i aktual. Aña pasá CAP a invitá Sr. John Pistole ku a elaborá riba e tópiko ‘Counter-terrorism’, Sr. Ted Martin ku a trata e tópiko ‘Insider threat’, i representando CAP tabata Sr. Martin Kattestaart ku a pone enfoke riba desaroyo di outomatisashon den seguridat na aeropuerto.

Durante e di kuater ‘AVSEC Conference’, Curaçao Airport Partners ta honrá di atrobe por ofresé ekspertonan kalifiká i respetá tantu internashonalmente komo lokal, komo orador. E aña aki partisipantenan lo siña i interkambia pensamentu ku Leticia Monteagudo, direktora ehekutivo di Smart Security Airport Consulting; Anthony Frederick, Manager AVSEC-FAL / HSSE unit na Trinidad &Tobago Civil Aviation; Lesley Fer, Direktor di Direktorado di Prevenshon i Maneho di Kalamidat bou di Ministerio di Asuntunan General di Kòrsou; i Ralph Blanchard, Chief Executive Officer di Curaçao Airport Partners.

Tokante e oradornan
Leticia Monteagudo ta direktora ehekutivo di Smart Security Airport Consulting i antes ehekutiva na IATA (International Air Transport Association), ku sigur 25 aña di eksperensha den aviashon i den posishon di un título di Bachelor of Science in Public Administraion i entre otro sertifikadonan di Harvard Business Mentor Program. Monteagudo tin interkambio ku mas ku 400 aeropuerto. Tambe e ta ofresé su servisionan pa sigur 180 kampaña; a realisá evaluashon di riesgo i proyektonan pa fasilidatnan pa biahero; estudionan riba kasonan spesífiko, i otro evaluashon na sigur 22 pais i na 60 aeropuerto internashonal. Monteagudo ta sostené aeropuertonan den nan evaluashon di riesgo, ku alabes mester promové e fluho di biahero na puntonan di kontrol, optimalisá e fluho den e áreanan públiko i kontribuí positivamente na e traspaso entre e área públiko te na avion. Leticia ta parti di un ret di profeshonalnan den e industria i regularmente tin kontakto ku miembronan di gobièrnu, outoridatnan den e área regulatorio, instansianan ku ta mantené órden, TSA (Transportation Security Administration), outoridatnan eksterno di kontrol, ICAO, AVSEC i otro organisashonnan internashonal, esaki ku e afan pa sinkronisá i implementá un proseso pa e biahero ku ta safe i basá riba riesgo real. Esaki lo mester oumentá seguridat, i alabes elevá e fasilidatnan ku ta ofresé na e biahero na aeropuerto. Leticia Monteagudo tabata embahadora regional di ‘IATA’s Security Access and Egress Program’ kual despues a desaroyá den e inisiativanan di Smart Security.

Anthony M. Frederick ta Manager di e departamentu ‘Aviation Security and Facilitation’ (AVSEC-FAL) i di e unidat Health Safety Security and Environment (HSSE) na e outoridat di aviashon sivil na Trinidad & Tobago (TTCAA). Frederick ta un profeshonal renombrá ku 25 aña di eksperensha den e area di aviashon. Antes di a drenta den funshon ta TTCAA, Anthony a traha den diferente funshon den mundo di aviashon, spesifikamente den e area di seguridat. Anthony tambe tabata apuntá pa tres aña komo alto funshonario i konsultant den e área di seguridat den aviashon na e ofisina prinsipal di ICAO (International Civil Aviation Organization) na Montreal Canada. Tambe e la traha riba e di ocho edishon di e manuak ‘ICAO Security Manual Doc 8973’, i a aktualisá un kantidat di kurso di sertifikashon di ICAO, inkluso e ‘ICAO AVSEC Professional Management Course’. Sr. Frederick ta un ‘ICAO Aviation Security Instructor’ sertifiká i un kontroladó ofishal den e área di seguridat bou di e ‘ICAO Universal Security Audit Programme’. Den e kapasidat aki e la realisá un kantidat di investigashon pa ICAO. Tambe Anthony ta Presidente di ‘Caribbean Aviation Safety and Security Oversight System (CASSOS) AVSEC-FAL Committee’ i miembro di ‘ICAO/LACAC AVSECFAL Regional Group’.

Den 2014 Lesley Fer a drenta den funshon na Direktorado di Prevenshon i Maneho di Kalamidat komo Direktor. Sr. Fer ta responsabel pa preparashon pa krísis i maneho di esaki na nòmber di e Minister di Asuntunan General. Alabes Fer ta e kordinadó na nivel tékniko ora tin kalamidat na Kòrsou. Fer tambe ta Presidente di e organisashon ‘Curaçao Disaster Management Organization’ ku ta konsistí di nuebe (9) grupo ku ta ofresé sosten durante emergensia, diferente NGO’s i sierto kompanianan privá. Un di e responsabilidatnan di Fer ta pa traha konsepto pa lei i regulashon den e área di prevenshon i maneho di kalamidat, i den su kapasidat a entregá ‘Landsverordening Rampenbestrijding’, the ‘Disaster Plan’ pa Kòrsou i e ‘Landsbesluit directie Risicomanagement & Disaster Management’.

CEO di Curaçao Airport Partners , Sr. Ralph Blanchard, tin 35 aña di eksperensia pa loke ta trata maneho ehekutivo na aeropuerto, den aeroliña, den kontrol di tráfiko aéreo, i den maneho di infrastruktura pa transporte aéreo i inisiativanan den desaroyo turístiko na e paisnan Merka, Saudi Arabia i den Karibe. Sr. Blanchard a nase na St. Thomas, Virgin Islands. E tin e título ‘Bachelor of Science in Aviation Management Science’ i ‘Master of Business Administration’, ámbos realisá na e universidat ‘Embry Riddle Aeronautical University’ situá na Daytona Beach Florida. E organisashon ‘American Association of Airport Executives’ a akreditá Ralph Blanchard e título ‘accredited Airport Executive’.