E plataforma online di músika di artistanan independiente di Karibe a firma un branding partnership eksklusivo ku e grupo di seguro Karibense

Willemstad, Kòrsou: Skempi i Guardian Group Fatum a kuminsá 2017 di un forma espektakular pa medio di e formalisashon di un branding partnership. Guardian Group Fatum ta masha entusiasmá di por traha huntu ku Skempi. “Skempi ta un plataforma inovativo i ta pone su enfoke espesialmente riba hendenan hóben na nos islanan. Guardian Group Fatum ta konsiente di e poder di komunikashon online ku e grupo aki. Nos ta sinti ku pa medio di e partnership aki nos por alkansá nos (futuro) klientenan i, banda di sòru pa nan entretenimentu musikal, tambe motivá nan pa pensa riba nan futuro (finansiero).”
E kooperashon entre e dos kompanianan ya a kuminsá bira visibel durante e Skempi Caribbean Music Awards na desèmber di 2016, na kual guardian grupo a duna un kontribushon konsiderabel.
E fundadónan i direktornan di Skempi Gino Jacobs i Boudino de Jong tabatin lo siguiente di bisa tokante e partnership: “Nos ta sumamente kontentu di ta partners ku un institushon di asina gran taya den nos komunidat. Nos ta en espera di e avansenan i inovashonnan ku e partnership aki lo trese i nos ta ansioso pa kuminsá riba e trayekto.” Guardian Grupo Fatum ta wòrdu agregá na e dos branding partners ya eksistente di Skempi kual ta UTS i MCB. Skempi i Guardian Group ta trahando huntu pa trese mas kontenido na nan base di kliente.

E aña aki tin hopi proyekto na kaminda den kual e dos partnernan lo traha huntu. Pues keda pendiente pasobra lo bai bini kosnan grandi!