Stichting Slachtofferhulp Curaçao, dia 11 di aprel 2017 ta selebrá 10 aña dunando servisio na víktimanan di un krímen i/o un aksidente di tráfiko i ta selebrá esaki ku e Workshop “ Slachtofferzorg 2017 – 2027’.

Stichting Slachtofferhulp a keda fundá na aña 2007 pa duna asistensha emoshonal, práktiko i hurídiko na tur víktima di un delito kastigabel pa nos kódigo penal i tambe víktimanan di aksidente di tráfiko i nan famia. E servisio ku SSHC ta ofresé ta 24 ora pa dia i kompletamente grátis pa tur kliente. Esaki ta garantisá ku e víktima por aserká nos ofisina na e momentu ku e tin mester di nos asistensia.

Den 2015, 1700 persona a risibí asistensia serka SSHC.  Kaso nan mas frekuente ta kasonan di abuso relashonal, atrako i aksidente di outo. Nos a tuma nota ku último 2 aña kasonan di trafikashon di hende tambe a tuma un subida. Durante transkurso di aña SSHC a duna mas ku 5000 mucha, hóben i adulto informashon tokante violensha relashonal. Den kuadro di selebrashon di 10 aña SSHC, nos a organisá dia 11 di aprel 2017 un workshop ku 16 organisashon otro organisashon i fundashon. E meta di e workshop ta pa uni forsa i kontinuá e servisio di SSHC pa e próksimo añanan. Nos mira komo SSHC ta di aña 2017 pa 2027, esta e 10 aña nan benidero. Kon SSHC por krea servisionan nobo i tambe intensivá e servisio ku ya kaba nos ta ofresiendo. For di workshop a sali diferente punto di atenshon ku SSHC lo traha riba durante 2017.

Stichting Slachtofferhulp Curaçao kier gradesí tur boluntario, trahadó, miembro di direktiva i partner den trabou pa nan aporte den e 10 aña di eksistensia di SSHC. I un  gradesimentu mas grandi na pueblo di Kòrsou ku a permití nos duna e servisio aki ku e garantia ku nos lo keda hasi nos máksimo pa ofresé e mihó servisio.