DANKI NA DISIPLINA, PERSEVERANSIA, DEDIKASHON I VISHON

Willemstad 11 di aprel 2017 –  Auto Rijschool Rapido proksimamente ta selebrá su di 35 aña di eksistensia.  E auto rijsschool ku Rignald “Niño´Castillo a kuminsá na 1982 ku un outo di 12 aña bieu awe ta un outoridat riba tereno di lès di kore vehíkulo riba nos kareteranan ku no ménos ku 5 empleado, 3 outo, 2 bròmer i un trùk.    Esaki no a bin fásil.  E empresa i sektor di dunamentu di lès a konosé tempunan bon pero tambe tempunan di reto, operando den un sektor no regulá pero tòg kumpliendo kabal ku su debernan.   Auto Rijschool Rapido pa e motibu aki ta gradisí prinsipalmente tur esnan ku a konfia den dje i tambe komunidat en general. Awe nos ta para ketu na e 35 aña di eksistensia, muestra ku nos empresanan chikí i mediano por ta eksitoso basta kombiná disiplina, perseveransia, dedikashon i vishon.

Na 1982 Niño Castillo, despues di laborá na un otro rijschool, a hañ’e presentá ku e realidat ku e mester bira un empresario di un dia pa otro.  Danki na e.o.  Sr. Pedro Paulina (q.e.p.d.), kende tabata su mèntor Wegen en Verkeer verordening i tambe lès di teoria, Niño Castillo a kuminsá duna lès di kore outo hasiendo uso di un outo di 1970.  E outo no tabatin forsa pa wanta e trabou di rijschool i rápidamente Niño mester a kumpra un Nissan 120 Y, ku a kosta Nafl.5000,-, sèn ku e mester a fia pa por a kumpli ku su trabou.  Ni 6 luna despues di kumpra e outo, esaki a aksidenta i Niño mester a sigui duna lès pa 2 aña largu ku un outo ku su dilanti tabata di dal.  Danki na su kerido mama defuntu, ku a para garantia, e por a kumpra un outo nobo despues di e dos añanan.  Ta riba e base aki a konstruí durante di e añanan ku ta sigui un auto rijschool ku a bira E instituto ora ta papia di duna lès di kore vehíkulo. Autorijschool Rapido no ta djis siña bo stür pa bo slag pa asina bo haña bo rijbeweis, pero ta siña bo stür pa bo sa kon manehá un auto.

Durante di e 35 añanan e empresa a konosé hopi reto.  E sektor di rijschool no ta regulá, loke ta hasié posibel pa un hende haña su reibeweis awe i kere ke por kuminsá duna lès mañan.  Den e sektor tin vários tambe ku ta duna lès banda di nan trabou regular, sin ta kumpli ku belasting i primanan sosial, algu ku ta kousa kompetensia inhustu.  Na 1993 gobièrnu Ulandes a para e fluho di hendenan ku tabata bin Korsou pa pasa nan eksámen di kore outo, algu ku tabata un bon fuente di entrada.  Kambionan den maneho sin konsenshi di e reperkushon a pone p.e. ku Rijschool Rapido p.e. invertí mas di Nafl.50.000 pa por tabata kla pa na momentu ku introdusí e sistema di pasa eksámen nobo Twin com pero gobièrnu di un dia pa otro a disidí ku ta hasi otro.  Bureau Rijbewijzen, ku pa aña ta generá mas di 3 mion florin, ta parse di no tin atenshon di gobièrnu.  Te ku dia di awe esnan ku ta pasa teoria ta pasa nan eksámen basa riba lei di 1957 miéntras ku nos bòrchinan riba kua ta konforme lei nobo di 2000.   Tur esaki kombiná ku un klima di hasi negoshi skèptiko pa ku empresanan di empresarionan lokal tabata e tera den kua Rijschool Rapido mester a mantené su posishon i sigui pa dilanti.

Awe Rijschool Rapido selebrando 35 aña no únikamente ta mira bèk ku satisfakshon pero tambe ta reafirmá su konfiansa den Kòrsou.  Siguridat den tráfiko ta un preokupashon di nos tur.  Auto Rijschool Rapido ta komprometé pa ta un aktor aktivo den siña esnan ku ta aspirá di logra nan reibeweis afin ku esakinan tin un aktitut responsabel riba nos kareteranan.