Willemstad – GiroCares, un fundashon di Girobank ku ta kere den e importansia di duna bek na nos komunidat pa medio di  trabou boluntario, ta organisá su promé aktividat ku ta un ‘Clothing Drive’. E Clothing Drive ta un evento kaminda esnan interesá por hasi un kontribushon noble tresiendo paña, sapatu i otro asesorio pa bisti, nobo òf den bon kondishon. Dia 23 di novèmber GiroCares lo tene e Clothing Drive na e branchnan di Girobank Janwe i Colon. Ku e meta pa rekouda 5 mil kilo di paña. E pañanan rekoudá durante e Clothing Drive, lo wòrdu surtí, labá, drechá i suministrá di puntuashon, kla pa drenta e GiroCares Thrift Store. Via di instansianan sosial GiroCares lo invitá tur esnan ku por duna e pañanan aki un bon uso i un segundo oportunidat. Esnan ku lo bini lo risibí un kantidat di punto pa asina por ‘kumpra’ den e GiroCares Thrift Store. E tienda lo ta un lugá agradabel pa shòp. E idea ta pa riba e dia aki e invitado tin un dushi eksperensia di kompra. E tienda lo ta pa tur edat i tur sekso. Pa duna un bon ehèmpel i pa ser e promé kompania ku ta duna, dia 22 di novèmber próksimo GiroCares tin su Clothing Drive pa tur empleado di Girobank. E dia aki trahadónan lo bai hasi nan donashon. Tambe ta bon pa remarká ku e proyekto aki ta wòrdu kargá kompletamente pa trahadónan di Girobank. E ‘Clothing Drive’ den kua henter Kòrsou por partisipá  lo ta riba dia 23 di novèmber próksimo, na Girobank Janwé i Girobank Colon. E orario ta di 9or di mainta pa 5or di atardi. Laga nos ban duna abundantemente i kontribuí en grandi ku nos komunidat. Girobank lo sigui ta komprometé ku bo.