WILLEMSTAD — Mundu farandulero den oranan tempran di awe mianta a keda di shòk ku e notisia ku Uti ya no ta mei mei di nos mas. Manera ta konosi, algun aña pasá, Uti a konfrontá problemanan serio ku salú i na e okashon ei, mester a bai risibi tratamentunan den eksterior.

Despues ku Uti a regresá Kòrsou, gradualmente, Uti a rekobrá su salud satisfaktoriamente i a kuminsá move i a presensia varios aktividat. Na 2016 miembronan a proponé durante di un reunion general unanimamente pa dediká Festival di Tumba na Uti Gregorio.  E eskoho aki tabata pa e trabounan meritorio ku Uti a realisà komo areglista di varios areglo eksitoso ku a keda premià. Despues ku Uti a termina skol na Korosu, el a bai Ulanda pa bai studia musika na konservatorium. Aki ela  milita den varios agrupashon musikal ku tabata toka diferente genero di musika. Uti tabata un freviente amante di musika di Jazz i komo tal tambe ela aktua den diferente konstelashon ku ta toka e musika di genero di Jazz.

Na Ulanda Uti a sera konosi ku  Richinel Keridongo alias Babalu i na momentu ku nan a regresa Korsou, Uti tabata un dje piesanan prinsipal di BESS.

BESS tabata un agrupashon musikal hopi popular ku tabata toka na un nivel musikal hopi haltu. E agrupashon musikal aki a  presenta tambe na Ulanda i despues di BESS Uti a forma parti tambe di Unisono. Uti tabata un di e fundadornan prinsipal tambe di Gio Fuertisimo ku atrabes di añanan a bira hopi popular den nos farandula i durante di diferente Festivalnan di Tumba. Uti tabata konosi komo un musiko kritiko serio, pero semper dispuesto na yuda otro hobennan ku ta inisia den e ramo di musika.

Korsou i mundu farandulero en espesial lo bai sinti hopi falta di un gran baluarte musikal manera Uti Gregorio, pero su areglonan i su musika lo keda resonà na radio emisioranan lokal, pa di e forma ei nos keda rekorde. UTI sosega na pas.

Direktiva di AMAK