ORANJESTAD , Aruba 7 april 2017 : Un biaha mas Aruba Bank tin e placer di forma parti di e tremendo Kite Slam anual, organisa pa Sport Club United. Pa e di 10 aña consecutivo e veld di SC United na Boegoeroei lo tin e miho show di fli di Aruba riba dianan 27, 28 y 30 di april.

Aruba Bank ta e patrocinado di e competencia y premio pa scoge e fli mas grandi. E categoria Fli Gigante lo tuma luga riba diadomingo 30 di april for di 9’or di mainta pa 7’or di anochi. E torneo di e “Fli Gigante” conoce dos categoria, esta Categoria E (3.50 m – 4.25 m) y Categoria F (4.30 m – 5.00 m). E aña aki atrobe e suspenso ta grandi pa mira cua fli ta mas bunita, cua ta mas grandi, y si cua lo bula.

E otro categorianan di competencia, esta Fli Mediano, ta tuma luga riba diahuebs, for di 9’or di mainta pa 7’or di anochi; y e Fun Night Event, e categoria Fli cu Luz, ta tuma luga diabierna anochi for di 7’or pa 12or.

Aruba Bank ta invita comunidad henter pa bin goza di un tremendo evento, y goza di tres dia di competencia, y celebra e arte di construi un fli cu e toke special di Aruba Bank.