WILLEMSTAD- Resientemente Konseho di Ministernan a aseptá un proposishon di minister Rhuggenaath di Desaroyo Ekonómiko pa transferí sierto pèrmitnan pa otro organisashonnan. Ta trata aki di algun pèrmit ku te na e momentunan aki ta wòrdu otorgá dor di Wetgeving en Juridische Zaken (WJZ). E traspaso di tareanan ta nifiká ehekushon di plannan ku a wòrdu palabrá i aprobá for di aña 2005 dor di Bestuurscollege di Kòrsou . Di akuerdo ku minister Rhuggenaath esaki ta un desishon importante den kuadro di redukshon di red tape i mehorashon di e servisio na e empresario.
Promé ku aña 2010 entrega di diferente dekreto i ordenansa tabata sosodé dor di Gezaghebber di Kòrsou. Ta trata aki di entre otro ordenansa pa sine, tienda di likor, restorant i salonnan di eiskrim. Na aña 2010 e tratamentu di e pèrmitnan aki a pasa temporalmente pa e sekshon di pèrmitnan ku ta kai bou di e sektor di Asuntunan General. Sinembargo esaki no tabata kuadra ku e plannan ku a wòrdu presentá na aña 2005 i ku tabatin komo meta pa pone kada pèrmit bou di e ministerio ku esaki ta pertenesé. Aparte di esaki, e echo ku lokèt di pèrmit na Ministerio di Gobernashon, Planifikashon i Servisio a bira operashonal a trese kuné ku awor hopi petishon pa pèrmit a keda sentralisá.
E tareanan di e sektor di Pèrmit ta diferensiá grandemente for di e otro trabounan di WJZ. Esaki ta trese kuné ku e tareanan aki no ta konosí pa e Sektor di Asuntunan General, pues a base di esaki a disidí pa hasi un traspaso di e tareanan. Den e periodo tras di lomba ya a hasi traspaso di e standplaats- i ventvergunning i tambe e kontrol riba e pèrmitnan di loteria na Ministerio di Desaroyo Ekonómiko. For di momento ku e traspaso aki a tuma lugá e entrega di e standplaats- i ventvergunning ta sosodé na Lokèt di Pèrmit.
Ku e desishon resien di Konseho di Minister e demas pèrmitnan tambe lo wòrdu transferí for di WJZ pa e ministerio en kuestion ku tin e konosementu pa husga i kontrolá kumplimentu di e petishonnan aki. Minister Ruggenaath ta antisipá ku e kambio aki lo trese hopi posibilidatnan nobo pa nos empresarionan. “Ku entrada di e kambionan aki Ministerio di Desaroyo Ekonómiko lo bira esun responsabel pa e asina yama Vergunnningslandsverordening i e Bioscoopverordening. Na momentu ku e traspaso di tareanan tuma lugá, e Lokèt di pèrmitnan na Saliña lo keda enkargá ku e parti di intake i entrega di e pèrmitnan en kuestion miéntras ku Ministerio di Desaroyo Ekonómiko lo enkargá su mes ku e parti di back office.”
Mas aleu e minister ta boga pa ámbos ordenansa keda evaluá mas pronto ku ta posibel. E Bioscoopverordening ta prosedente for di aña 1909 i e último bia ku esaki a wòrdu adaptá tabata na aña 1965. Meskos ta konta pa e vergunningenlandsverordening kual ta datá for di aña 1963. Hopi kos a kambia for di e tempu ku e ordenansanan aki a wòrdu saká originalmente, tantu aki na Kòrsou komo den e mundu rondó di nos. Esaki ta nifiká ku pa kada un di e ordenansanan aki nos ministerio lo mester evaluá kiko tabata e meta prinsipal su tras, si akaso e meta aki ainda ta relevante den e tempu di awor i si akaso tin un sistema diferente i mihó pa tòg realisá e meta aki. Na final di kuenta nos sistema di pèrmitnan lo mester bira mas simpel i efektivo pa e empresario.”
Den e periodo benidero, Ministerio di Desaroyo Ekonómiko huntu ku e demas ministerionan konserní lo start un kampaña pa informá un i tur di e desishon aki ku a wòrdu tuma dor di nos Konseho di Minister. Minister Ruggenaath ta enfatisá ku ta importante pa a lo largo di e proseso kada persona ta bon informá na unda nan mester ta. E ministerionan konserní lo reuní riba e tema aki pa asina palabra konkretamente kon ta bai duna kontinuashon na e kambio aki i tambe sinkronisá e aserkamentu. E minister ta spera ku esaki lo ta un paso mas den e bon direkshon pa asina por duna mihó servisio nan nos empresarionan lokal