Willemstad- Ayera tardi e agrupashon musikal ERA a tene su konferensha  di prensa kaminda e integrantenan a informá di nan aktividat ku nan ta bai organisá pa dje forma aki selebrá  nan di 7 lustro. 35 aña pasa e banda a lanta komo Ekspresando Ritmo i Ambiente i liber pa liber ta konta den e mihó agrupashonnan musikal di tur tempu aki na Kòrsou. ERA último añanan ta e agrupashon musikal ku tin nos farándula kargá ku ambiente i ta halando masha hopi fanátiko mes na tur nan presentashonnan.

Dia 9 di aprel ta dia ku nan ta selebrá nan 35 aña di eksistensia pero e selebrashon mes ta tuma lugá dia 29 di aprel den WTC. ERA i Buleria direktamente for Aruba lo bai toka henter anochi pa un i tur por gosa i selebrá 35 aña ku ERA. Pa e okashon aki ERA ta bai tin un spesial djabièrnè awor 17 di mart kaminda nan lo bende 350 karchi pa e fiesta aki na rason di 35 florin. Pues 35 aña ERA 350 karchi na benta pa 35 florin. Esaki ta tuma lugá na e establesimentu di Licores Maduro na Dokweg for di mitar di 13.30 or di  te 17.oo or. Pa esnan ku kier bebe awa limpi mester tene kuenta ku ta bende te un máksimo di 5 karchi pa persona.  Despues di e ganga aki karchinan ta bira 55 florin i tin e sekshon di VIP tambe ku ta kosta 185 florin ku tur kos inkluí. Karchinan pa e dushi i bunita ambiente aki ta optenibel na Mensings Caminada, Tik Tak, Beep Beep i 24 uur uit de Muur. Pa e karchinan VIP esakinan ta optenibel solamente na Mensings Caminada.  Pues abo fanátiko kòrdá ku djabièrnè awor tin ganga i wak pa bo tei trempan na Licores Maduro pa bo por tin sigur di bo karchi na rason di 35 florin. ERA ta invitá bo pa bin selebrá ku nan tur afó dia 29 di aprel den WTC.