Willemstad – E produkshon di e pelíkula pintá bilingwe ‘Tooby en de Bosbende / Tooby i Porkeria den Mondi’ ta kla, despues di traha duru dos aña largu. Kuminsando e siman aki tur skol na Kòrsou lo risibí un dvd grátis pa hasi alumno mas konsiente di medioambiente. Tambe lo tin estreno djaweps awor na WTC pa tur spònser, aktor i boluntario.

E siman akí ta den kuadro di “Tooby”. Na radio Dolfijn FM tin un kues, kada dia, kaminda mucha por gana un dvd. Awe Fundashon Material pa Skol (FMS) a kuminsá otrogá e pelíkula ku su buki na tur skol.

Willemijn Jussen a inisiá e proyekto akí, anto e ta spera yuda konsientisá mucha yòn di balor di medioambiente. Danki na e aporte di 38 spònser, entre otro MCB i Prins Bernhard Cultuurfonds Caribisch Gebied, por a realisá e pelíkula akí.