Proyekto ‘Peace Love & Music’ ku un meta di bida su tras
WILLEMSTAD –Dianan 25 i 26 di mart awor e perkushonista Kurasoleño Vernon A.J. Chatlein lo estrená su disko kompakto nobo titulá ‘Peace Love & Music’ den dos anochi di konsierto, respektivamente na Avila Beach Hotel i Teatro Luna Blou. Anke ku e disko aki mes ta grabá ku artistanan internashonal, pa e lansamentu e luna aki Vernon Chatlein a forma un kinteto di músiko lokal ku ken el a yega toka na numeroso okashon, manera e pianista Randal Corsen, e basista Eric Calmes, e perkushonista Ernie Gregorius, su amigu saksofonista Godwin Louis for di New York i e kantante Amber Nijman for di Hulanda. Karchi di entrada pa e konsiertonan ta na benta na rason di 50 florin pa persona na Avila Beach Hotel, Mensing’s Caminada, TicketsCaribbean.com i tambe via FunMiles. E último aki ta patrosinador huntu ku Orco Bank, Curinde, Kas di Kultura, Prins Bernhard Cultuur Fonds i Mau-Asam Travel.
Awe tardi na un konferensia di prensa den e ‘Voyager Lounge’ di Avila, Vernon Chatlein no tabata presente físikamente, pero tòg atraves di Skype prensa por a hasié pregunta. Na e okashon aki a para ketu na e historia di e músiko lokal aki.Vernon Chatlein al momento ta biba i traha na Hulanda komo perkushonista profeshonal i dosente musikal i ta riba gira rònt mundu. Despues di terminá su estudio na Universidat di Antia, kaminda el a optené e grado di Bachelor Information and Communication Technologies, ela sigui studia músika. Promé na Conservatorio Amadéo Roldán na Havana, Cuba, i despues na Conservatorium van Amsterdam, Hulanda. Asina el a sigui ku su pashon: komponé i hasi muzik.
Komposishonnan
Pa ‘Peace Love & Music’ Vernon Chatlein a reuní algun di e mihó músikonan pa representá e idioma i zonido ku e ke den su muzik. Nan ta bini di Italia, Hulanda, Alemania, México i Kòrsou. Título di e disko ta un proyekto PLM (Peace Love & Music) ku Vernon ta mira komo sosiedat online promoviendo pas i amor atraves di músika i arte ekspresivo.
Pa loke ta e komposishonnan riba su di dos disko aki Vernon ta bai bèk na su rais i ta eksplorá ritmonan di su isla natal. E ta inkorporá tambe vários elemento, manera kanto i ritmonan Afro-Cubano, miéntras ku e ta hasi uso ábilmente di temanan melódiko i improvisashon komo base di su komposishonnan. Ademas, el a inkluí e konosido Dudok String Quartet ku nan instrumèntnan di arko i e antropólogo i poeta Kurasoleño Juan-Carlos Goilo tambe den un di e piesanan riba e disko, loke ta duna e totalidat un toke mas diferente i sorpresivo ainda. Tur esaki huntu ta hasi e konsiertonan di dianan 25 i 26 awor na respektivamente Avila i Teatro Luna Blou mas interesante.
Pa kontakto: Allan Chatlein, tel. nr. 510-2863