E teremoto ku a tuma lugá dia 9 di Mart ta ilustrá ku proseso geológiko den área Karibense ta variá i sa duna sorpresa. Por splika e suseso aki, i tambe otro susesunan geológiko den nos área, ku informashon sientifiko ku ta keda kolektá pa geólogonan. I e informashon aki ta un parti integral di e kurso di Geologia di Korsou ku Curassavica N.V. huntu ku Curacao Footprint Foundation lo kuminsá ku n’e djaweps dia 23 di Mart. For di dia 23 di mart Curassavica N.V. huntu ku Curacao Footprint Foundation ta organisá e kurso di Geologia di Kòrsou un biaha mas. Tur hende ku tin interes den naturalesa en general i proseso geológiko en partikular, tambe den relashon ku turismo, edukashon, konstrukshon, arkeologia i mas, ta haña den e kurso aki informashon básiko balioso di e materia aki. E formashon di mundu i e prosesonan geológiko ku a yuda form’é te ku lo ke e ta awor aki semper ta parti di imaginashon di hende. Tambe pa motibu ku e prosesonan geológiko aki te ainda ta tuma
lugá i asina ta kambia e pareser di nos planeta kada biaha. E fundeshi geológiko di Kòrsou ta responsabel entre otro pa e ekologia di e isla, i tambe ta duna e pareser físiko di nos isla. E temanan ku lo trata durante e kurso ta:
– Prinsipionan básiko general di geologia, piedra i mineral;
– Prosesonan geológiko grandi (manera ‘Platentektoniek’);
– E gruponan di piedra di mas importante riba nos isla i nan karakterístika;
– E historia geológiko di Kòrsou.

Lo sera e kurso ku un ekskurshon den kua lo mustra e diferente grupo di piedra na vários lugá. Geólogo Drs. Leon Pors lo ta e dosente di e kurso ku ta konsistí di 5 lès di teoria riba dia 23 i 30 di Mart i 6, 13 i 20 di Aprel di 19.00 te ku 21.30 or, i un ekskurshon riba dia 22 di Mart di 07.30 pa 16.00 or. Partisipashon ta kosta Naf. 295 pa persona ku ta inkluí material, snack, kòfi ku te i un lunch durante e ekskurshon. E preis ta inkluí 6% ob. Por inskribi pa medio di un email pa info@curassavica.com ku nòmber, number di telefón i tambe nivel di edukashon. E ultimo fechanan di e kurso ta planeá den e fakansi largu di Pasku di resurekshon, pero den e grupo lo diskutí posibel kambio den esaki. Pa mas informashon por yama
522-8289 .