WILLEMSTAD, – Novèmber 2013: Fundashon BEN Cares fundá dor di personal di Banco di Caribe, ENNIA i NIBanc, resientemente a kontribuí na selebrashon di  dia di hende grandi organisá pa Wit Gele Kruis. E meta prinsipal di e selebrashon tabata pa brinda e grandinan un dia ameno na unda ku nan por a disfrutá di un dushi ambiente, algu di kome i bebe i pasa un ratu  sosial. Fundashon BEN Cares a uni su mes na e selebrashon, ofresiendo 60 boluntario for di tantu Banco di Caribe, ENNIA i NIBanc pa yuda ku partimentu di kos di bebe, kuminda i hiba kombersashon ku e grandinan. E selebrashon a tuma lugá den stadion Odulio Willems, Suffisant na unda ku nos grandinan a disfrutá di un ambiente ameno i a haña oportunidat di sosialisá i kompartí ku otro. Ku partisipashon na selebrashon di dia di hende grandi, Fundashon BEN Cares ta kumpli ku meta prinsipal di tur empleado afiliá na e fundashon esta di, sostené bon inisiativanan den nos komunidat i kontribuí na desaroyo positivo i duradero di nos pais. Riba foto athuntu, un parti di e grupo di empleadonan konsistiendo di Banco di Caribe, ENNIA i NIBanc durante di e selebrashon dediká na Nos Grandinan organisá dor di Wit Gele Kruis.