Jazz Fest na Brakkeput Mei Mei

WILLEMSTAD – Djasabra dia 1 di aprel Brakkeput Mei Mei lo ta den ambiente di jazz, ku i pa hende di tur edat, ku Randal Corsen komo lider artístiko di e festival musikal aki. E programa lo enserá presentashon di Perfect Fourth (latin jazz di e generashon hóben), Dennis Aalse ku kuarteto (pa main stream US jazz) i Randal Corsen & Friends ku un berdadero homenahe na e kantante Merikano di jazz i pòp Al Jarreau ku a fayesé resientemente. Pa esei diferente solista invitá lo sali komo sorpresa. For di otro siman e karchinan na rason di 50 florin pa persona lo ta na benta na e direkshonnan di kustumber.

Aparte di ta un ekselente restorant i un sitio ideal pa dibertishon pa grandi i chikí, pa hopi tempu kaba Brakapoti Mei Mei ta e lugá pa ekselensia tambe pa múltiple espektákulo kultural i spesialmente pa ekspreshonnan musikal – i for di salida músika di jazz a forma parti di esei. No solamente Curaçao Jazz Foundation tabata tene su evento anual kada be aya. E organisadónan di e anual Curaçao North Sea Jazz Festival tur e shete biahanan tambe a skohe e sitio aki komo antesala pa nan evento grandi na Brakapoti pa mustra kiko por spera despues. Por ehèmpel, algun artista grandi ku a subi tarima na Brakapoti manera entre otro Gregory Porter, Richard Bona i … Al Jarreau. E último artista aki di fama mundial, ku a fayesé resientemente, dia 31 di ougùstùs aña pasá ainda a presentá na Brakapoti (wak e riba potrèt) i e konsierto ei tabata un tremendo promé paso den direkshon di e festival di e siguiente tres dianan na WTC. Mas detaye di e tipo nobo di festival Jazz Fest aki lo sigui pronto.