WILLEMSTAD.- Djaluna anochi a tuma lugá e apertura di e di tres filial di ‘The Green House Bar & Grill Restaurant’. Situá na Curaçao Beach Boulevard, konosí komo Mambo, e restorant di famia Al-Jourdi ku ta sumamente popular bou di hendenan lokal i awor situá na un sitio netamente turístiko, nan ta kombensí ku ‘The Green House 3’ lo ta eksitoso. Na 2005 Ali, Mazen i Firas Al-Jourdi a kuminsá ku e promé restorant ‘Green House’ situá na Sta. Rosa. Na 2007 e di dos restorant a habri riba F.D. Rooseveltweg i despues di 6 aña e di tres filial di ‘The Green House’ ta mira lus di dia.

MENU

E menú di ‘The Green House’ a keda ampliá na Boulevard. E menú ta konsistí di un sekshon mediteráneo, e mas ekskisito steaknan i un sekshon di ‘seafood’ ku ta lagabu keda impreshoná pa e variedat amplio. ‘Nos ta sumamente kontentu ku apertura di The Green House 3. E proyekto aki ta resaltá e konfiansa ku nos tin den ekonomia i turismo di Kòrsou. Pa e lokalidat aki nos a amplia nos menú pa asina kumpli ku tur e eksigensianan internashonal. Nos ta kombensí ku si bo sinta ketu nada no ta pasa, bo mester move pa por logra éksito. Un danki na Maduro & Curiel’s Bank ku a kere den e proyekto aki meskos tambe na nos arkitekto i tim di trahadónan ku huntu a kontribuí pa realisá e proyekto aki’, asina Ali Al-Jourdi, un dje propietarionan a enfatisá durante su diskurso di apertura.

ORARIO

The Green House na Curaçao Beach Boulevard ta habrí diariamente for di 5’or di atardi te ku 12’or di anochi i kuminsando otro siman lo habri for di 11’or di mainta pa dje forma ei ofresé ‘lunch’ i ‘dinner’ na nan klientela. Riba djamars di 7’or pa 9’or di anochi tin ‘Happy Hour’ meskos ku djabièrnè i djasabra di 6’or pa 8’or di anochi. Fuera di esei ‘The Green House’ ta ofresé na su klientela tambe e oportunidat pa disfrutá di e popular ‘Shisha’, ku diferente sabor.

Buskando un kaminda pa kome, nos ta rekomendábu bishitá ‘The Green House’ na Curaçao Beach Boulevard.