Dia 4 di novèmber último AGKK, ku koperashon di Kas di Kultura, a organisá nan prome rueda di prensa tokante Karnaval 2014. Durante di esaki a hiba palabra Sr. Giovani Roozendal (Presidente AGKK), sr. G.  Bacilio (Direktor Kas di Kultura), sra. Sharmine Rodriguez (Presidente Fundashon Karnaval Bándabou) sr. Frank Do Rego (AutoCity), sra. Niata Augusta (Fundashon Alelimo) i Sr. Dennis Puriel (Pro Art Productions). E siguiente puntonan a bin dilanti.

Direktiva nobo AGKK                                                                                                                                                                

AGKK entretantu tin un direktiva nobo ku ta konsistí di Giovanni Roozendal, Moizes ‘Boeis’ Augusta (Vise Presidente), Percy Lebacs (Tesorero), Bryan Busby (Sekretario), Monique Maria (Komisario enkargá ku parti Hubenil), Minouschka St. Jacoba (Komisario enkargá ku parti Hubenil) i Alice Tielman ( Komisario enkargá ku parti di Tiner)                                                                                                                                                                        

Kalendario di Karnaval kombiná                                                                                                                                                                      

E aña aki ta promé pa krea un kalènder di aktividat den kual aktividatnan di Karnaval di Bándabou tambe inkorporá.

 Lema                                                                                                                                                                                          

Pa e periodo di Karnaval 2014 lo usa e siguiente lema: Ku Kòrsou na mente, nos Karnaval ta ekselente!

Spònsernan                                                                                                                                                                                  

Ya tin sinku spònser ku a konfirmá ku e aña aki atrobe lo sostené organisashon di Karnaval. Esakinan ta Autocity, Insel Air, Selikor, Foto Studio Tramm i Vista Bike.                                                                   

Organisashon Elekshonnan i Tumba Hubenil 2014                                                                                                  

E aña ki Pro Art Productions, bou di guia di Dennis Puriel, ta enkargá ku organisashon di Elekshon Rei i Reina Tiner, Elekshon Reina, Prens & Pancho Mucha i Hende Grandi. Organisashon di Festival di Tumba Hubenil ta un biaha mas den man di Fundashon Alelimo, bou di guia di sra. Niata Augusta. E aña aki tambe lo usa e konsepto di tumba di mucha pa mucha. Tumbanan lo ser kanta pero tambe komponé pa hóben.

Premiashon prinsipal Elekshon Reina Hende Grandi

AGKK ke purba mas tantu posibel pa tur elekshonnan di Karnaval ofresé premio  balioso, ku balor  agregá pa e partisipantenan. Pa karnaval 2014 e premio prinsipal pa e Reina di Karnaval lo ta un outo, di Autocity.

Ruta                                                                                                                                                                                

E ruta di karnaval a keda igual ku aña pasa. E lo sali for di Jan Noorduynweg sigui via Rooseveltweg, Plasa Hariri, Roodeweg, Breedestraat kaba na Plenchi tráfiko Ergilio Hato.