Willemstad,  JW Organization ta organisando un elekshon di Rei i Reina La Tentashon i lèsnan di baile Folklóriko. Jessy Waal tin 41 aña aktivo den e mundu artístiko aki na Kòrsou. E ta un persona dinámiko ku tin su mes grupo di baile,  Crazy Teremoto. E  ta forma parti den diferente grupo di baile manera Dushi Kòrsou aparte di esei  e ta duna show folklóriko pa turistanan ora ku barku krusero yega na Mega Pier.

Jessy ta na kabes di “JW Organization” ku ta organisá diferente sertámen manera Mama Modelo  i Prinsesita i Mini Gala Modelo i awor elekshon di Rei i Reina La Tentashon.

Aña pasa tabatin e promé elekshon di Rei i Reina La Tentashon kaminda Jodi-Ann Domatila & Engelbert Kramers a sali e ganadónan.  Nan a partisipá den e diferente marchanan di Karnaval ku tabatin i forma parti di algun evento di JW Organization. Jessy a bin ku e inisiativa di bolbe organisá un elekshon i e ta buskando hóbennan ku tin gana di partisipá.

Aparte di e elekshon Jessy ke duna bek tur loke e la siña durante di su añanan komo bailarina.  Ta pa e motibu ei, e lo kuminsá  ku su lèsnan  di Mazurka, Wals, Danza, Seu, Tumba, Tambú riba djarason.       Aña pasa dezèmber  e tabatin su promé presentashon ku e grupo ku a inskribí den e luna di sèptèmber 2016.

Si bo ta interesá pa sa mas tokante di e dos proyektonan aki tuma kontakto mes ora ku Jessy Waal awe mes na number di Telefon: +5999 661-1036 òf +5999 517-9433